IBSU-ს რექტორი, ილიას ჩილოღლუ ფეისბუქის გვერდზე ვიდეომიმართვას ავრცელებს და ამბობს, რომ უნივერსიტეტმა დღეს, 26 აგვისტოს 715 000 ათასი ლარის ოდენობის ჯარიმა გადაიხადა.

რექტორი მოუწოდებს ცენტრს, გააბათილოს გადაწყვეტილება და 27 აგვისტოს, 6 საათამდე აძლევს დროს, რათა აბიტურიენტებს შავი ზღვის საერთაშორისო უნივერსიტეტში სწავლის საშუალება მისცენ.

"შავი ზღვის საერთაშორისო უნივერსიტეტმა დღეს ჯარიმა გადაიხადა, მიუხედავად იმისა, რომ სამართლებრივი დავა არ დასრულებულა და ამის ვალდებულება არ ჰქონია. თუმცა, იბსუ პასუხისმგებლობას გრძნობს იმ აბიტურიენტების წინაშე, ვისაც ჩვენთან სწავლა სურთ", - ნათქვამია უნივერსიტეტის განცხადებაში.

რექტორის განმარტებით მათი დავალიანება დაახლოებით 700 000-ია, უნივერსიტეტის ქონების აქტივები კი 27 მილიონ ლარს შეადგენს. ამიტომ მისი თქმით, არანაირი საფრთხე არ არსებობდა, რომ უნივერსიტეტს ეს თანხა ვერ გადაეხადა.

შავი ზღვის უნივერსიტეტის საზოგადოებასთან ურთიერთობის სამსახურის ცნობით, უნივერსიტეტს 2013 წელს საგადასახადო ჯარიმა დაეკისრა. ჯარიმის ოდენობა 700 ათასი ლარია და მისი სამართლიანობის შესახებ ამჟამად სასამართლო დავა მიმდინარეობს. ჯარიმის გამო უნივერსიტეტის ქონებას ყადაღა ადევს:

"107 ბავშვი კიდევ არის დარეგისტრირებული და არ გადადიან სხვა უნივერსიტეტში. ჩვენ რაღაც უნდა გავაკეთოთ, რათა დავიცვათ ამ ბავშვების უფლებები. 107 კი არა 1 სტუდენტიც რომ იყოს, იმის უფლებაც უნდა დავიცვათ. ჩვენ სტუდენტებთან ერთად გადავწყვიტეთ ეს".

განათლების ხარისხის განვითარების ეროვნული ცენტრის განმარტებით, ფინანსურმა პრობლემებმა, რომელთა წინაშეც შავი ზღვის უნივერსიტეტი დგას, შესაძლოა სასწავლო პროცესები სერიოზული რისკების წინაშე დააყენოს.

"იმისათვის, რომ გათვალისწინებული იყოს სტუდენტთა ინტერესები, მათთვის სასწავლო პროცესთან დაკავშირებით რისკების თავიდან ასაცილებლად, უნივერსიტეტს სტუდენტების მიღების უფლება 1 წლის ვადით შეეზღუდა", - განაცხადეს ხარისხის განვითარების ეროვნულ ცენტრში.

საქართველოს განათლების სამინისტროს განცხადებით, იმ აბიტურიენტებისთვის, რომლებსაც შავი ზღვის საერთაშორისო უნივერსიტეტში ჩაბარება სურთ, რიგგარეშე მობილობა გამარტივებული წესით გამოცხადდება. ეს ნიშნავს, რომ ისინი სხვა ავტორიზებულ საგანმანათლებლო დაწესებულებებს აირჩევენ და ახალ სასწავლო წელს დანარჩენ სტუდენტებთან ერთად დაიწყებენ.