თურქეთში სამხედრო პუტჩის წარუმატებელი მცდელობის შემდეგ, ერდოღანი და მისი მომხრეები განსაკუთრებული მონდომებით ცდილობენ სამხედროების წინააღმდეგ კომპრომატების მოპოვებას და ამ მისიის შესასრულებლად ძალას არ იშურებენ.

ერთ-ერთი ასეთი მცდელობა, რომელიც პრო-სამთავრობო ტელევიზიას ჰქონდა, კურიოზულად დასრულდა.

კერძოდ, ATV-ს ჟურნალისტმა რეპორტაჟის მომზადებისას პატარა წიგნაკი აღმოაჩინა, რომელიც კამერას მიუშვირა და ურცხვად ამტკიცებდა, ამ წიგნაკში დაწერილი სიტყვები დაშიფრული ენაა და სამხედროები სახელმწიფო გადატრიალების მოსაწყობად იყენებდნენო.

ფურცელზე გარკვევით წერია სიტყვები, „თვითმფრინავი“, „იარაღი“, „ამინდი“, „სიცოცხლე და შეიარაღება“ და ა.შ., რომელსაც ქვემოთ შესაბამისი კოდი ჰქონდა მიწერილი.

ჟურნალისტის აზრით, სიტყვების გაურკვეველი წყობა დაშიფრული ტერმინოლოგია იყო იმ სიტყვების აღსანიშნად, რომელიც ზედ ეწერა.

სად იყო და სად არა, ეს სიუჟეტი ინტერნეტშიც გამოჩნდა და თურქული ინტერნეტ სივრცის ტრენდებშიც მოხვდა, ოღონდ არა მისი შინაარსის, არამედ ჟურნალისტის სულელური შეცდომის გამო.

აღმოჩნდა, რომ ჟურნალისტის მიერ „გაშიფრული“ კოდები, სინამდვილეში არა რევოლუციის მოსაწყობად გამოყენებული ტერმინები, არამედ ვიდეო თამაშის GTA IV-ის კოდები იყო.

ჟურნალისტის წამოყენებული ვერსია მომხმარებელთა სახუმარო თემად იქცა:

ფოტო: Youtube

"1960 წლის 27 მაისის პუტჩი - GTA I
1971 წლის 12 მარტის პუტჩი - GTA II
1980 წლის 12 სექტემბრის პუტჩი - GTA III
2016 წლის 15 ივლისის პუტჩი - GTA IV

შემდეგში დაგეგმილი პუტჩის თარიღები გთხოვთ იხილოთ მითითებულ ლინკზე: rockstargames.com".

ფოტო: Youtube

„როგორც ჩანს მთელი შეიარაღება, თავისი ტანკებით, ყუმბარებითა და თვითმფრინავებით GTA IV-ის კოდებით დაუთრევიათ, ყოჩაღ!“

GTA ვიდეო თამაშია, რომელშიც პერსონაჟი კრიმინალურ ძალებთან ურთიერთობს და სხვადასხვა მისიებს ასრულებს. აღნიშნული კოდების შეყვანისას, მოთამაშე სხვადსხვა სახის ბენეფიტებს იღებს, რის შედეგადაც თამაში ბევრად ადვილი ხდება.