ქუთაისის აეროპორტში ავიაკომპანია Wizzair-ის თვითმფრინავმა ტექნიკური გაუმართაობის გამო რეისი, ქუთაისიდან დორტმუნდის მიმართულებით ვერ შეასრულა. ამის შესახებ On.ge-ს თვითმხილველმა და ამავე რეისის მგზავრმა ქეთი მაჭავარიანმა განუცხადა.

მისი თქმით, თვითმფრინავს პრობლემები ადგილიდან დაძვრისთანავე შეექმნა.

"ჩავსხედით ყველა, თვითმფრინავი გაფრენას აპირებდა. როცა აფრენა დაიწყო, მოხდა საშინელი ბიძგი და ძირს დავეხეთქეთ. პილოტმა დაამუხრუჭა, რამაც გამოიწვია კვამლი და საშინელი სუნი", - ამბობს ქეთი მაჭავარიანი.

მისი თქმით, ქუთაისის აეროპორტის წარმომადგენლებმა უთხრეს, რომ თვითმფრინავის სიჩქარის მაკონტროლებელი წყობიდან გამოვიდა და პილოტმა დაშვების გადაწყვეტილება მიიღო.

"ახლა გვითხრეს, რომ პრობლემა მოგვარებულია და გაფრენა შეგვიძლია, თუმცა მგზავრების ნაწილი გამგზავრებას ვერ ბედავს", - უთხრა On.ge-ს ქეთი მაჭავარიანმა.

ქუთაისის აეროპორტში განმარტავენ, რომ თვითმფრინავი უნდა აფრენილიყო, თუმცა ტექნიკური გაუმართაობის გამო რეისი ვერ შეასრულა.

"ავიაკომპანია ვიზეარის რეისი ქუთაისი - დორტმუნდი, პროგრამული ხარვეზის გამო, ხომალდის ეკიპაჟის კაპიტნის გადაწყვეტილებით, აფრენამდე დაბრუნდა სადგომზე. ამჟამად მიმდინარეობს საჰაერო ხომალდის ტექნიკური შემოწმება, რის დასრულების შემდეგაც გაცნობებთ დამატებით ინფორმაციას", - ნათქვამია ქუთაისის აეროპორტის მიერ გავრცელებულ განცხადებაში.