დღეს, 26 ივნისს, საღამოს 7 საათზე საერთაშორისო ფესტივალი Echowaves პრეზენტაცია გაიმართა. ღონისძიების წარმომადგენლებმა საორგანიზაციო ჯგუფის წევრები დააკომპლექტეს, ასევე ფესტივალის დროს დაგეგმილ მუსიკალურ და გასართობ აქტივობებზე ისაუბრეს.

Echowaves 23-დან 26 აგვისტოს ჩათვლით, Check in Georgia-ს ფარგლებში, ანაკლიაში ჩატარდება. ჟანრობრივად განსხვავებულ 5 სცენაზე 150-მდე არტისტი წარსდგება მსმენელის წინაშე. მათ შორის არიან:

  • Tricky;
  • Solomun;
  • Jonas Kopp;
  • Function;
  • Matthew Dekay;
  • Kollektiv Turmstrasse;
  • Juan Atkins feat. Dzijan Emin & Tbilisi State Conservatoire Orchestra;
  • Nu;
  • Dominik Eulberg;
  • Henrik Schwarz;
  • Viken Arman;
  • Derrick Carter;
  • Sigha;
  • Antigone და სხვ..

ლაინაფის სხვა წევრები დამატებით ერთი კვირის შემდეგ გახდება ცნობილი. ფესტივალის პროექტების მენეჯერი ლანა პაჰიჩი ამბობს, რომ ქართველ მსმენელეს წინ კიდევ ბევრი სიურპრიზი ელის.

"ცოტას თუ მოითმენთ, ნახავთ, რომ წინ კიდევ უფრო დიდი სიურპრიზი გელით. ჩვენ ვცდილობთ, რომ საუკეთესო არტისტები ჩამოვიყვანოთ ფესტივალზე და 3 დაუვიწყარი დღე ვაჩუქოთ მსმენელებს", - ამბობს ლანა პაჰიჩი.

Echowaves ერთ-ერთი ყველაზე დიდი ევროპული ფესტივალის, Exit-ის ქოლგის ქვეშ ტარდება. ფესტივალის მიზანია რეგიონის კულტურულ განვითარებაში მნიშვნელოვანი წვლილის შეტანა და ტურისტულად მიმზიდველი პროექტის შექმნა. გარდა მუსიკისა, Echowaves ფესტივალი მოიცავს სპორტულ აქტივობებს, თეატრალურ, სახელოვნებო, კულტურულ ღონისძიებებს, ასევე სოციალურ და საგანმანათლებლო პროექტებს.

ახალ საერთაშორისო ფესტივალზე დიდი ყურადღება ექცევათ ქართველ მუსიკოსებსაც, რომლებიც Echowaves-ზე დაუკრავენ. ესენი არიან: BACHO, Gio Shengelia, Stimmhalt, Tomma, Frequency Shifter, Greenbeam & Leon, Yanamaste და სხვ.

"ამ პროექტის მთავარი მიზანია, რომ ანაკლია, როგორც საფესტივალო ტერიტორია, გაცილებით უფრო პრესტიჟული და ცნობადი გახდეს. ანაკლიას ამის ყველანაირი რესურსი აქვს - ულამაზესი სანაპირო, ინფრასტრუქტურა, კულტურული მიმზიდველობა და სხვ. Check in Georgia-სთან ერთად ამ მიზნის მიღწევა სავსებით რეალურია და ძალიან ცნობილი მუსიკოსების მოწვევით, ჩვენ გვჯერა, რომ ფესტივალი წარმატებული იქნება", - ამბობს Echowaves-ის პროექტების მენეჯერი ლანა პაჰიჩი.

Exit Festival 2000 წელს დაარსდა. მას საფუძველი დიდი სტუდენტური მოძრაობა დაუდო, რომელიც სერბეთში დამოუკიდებლობის და თავისუფლებისთვის იბრძოდა. გარკვეული პერიოდის შემდეგ Exit Festival სრულფასოვან მუსიკალურ ფესტივალად ჩამოყალიბდა, რომელიც ყოველწლიურად მსოფლიო მუსიკალური სცენის ვარსკვლავებს მასპინძლობს.

დაარსებიდან დღემდე Exit Festival-ის სცენაზე ისეთი არტისტები უკრავენ, როგორებიც არიან Depeche Mode, Guns N' Roses, Massive Attack, Faithless, Arctic Monkeys, Jamiroquai, Portishead, Wu-Tang Clan, The Prodigy, Sex Pistols და სხვა.