საქართველოს პრეზიდენტის გიორგი მარგველაშვილის განცხადებით, ქართული ოცნების მმართველობისა და იმ დამოკიდებულების პირობებში, რომელიც არის პროკურატურისა და სამართალდამცველი ორგანოების მიმართ, ვერც ერთი საქმე გამოძიებული ვერ იქნება.

პრეზიდენტის თქმით, ეს არ ხდება პირველად და საქართველოში, პოლიტიკური ხელისუფლება ხშირად სამართალდამცავების მძევალია.

"ხელისუფლება დაკავებულია სამართალდამცავებისთვის მაქსიმალურად კომფორტული პირობების შექმნით, ეს იყო ნაციონალური მოძრაობის, შევარდნაძის დროსაც. საბჭოთა კავშირის ტრადიციაა, რომ მაღალი თანამდებობის პირებს დღის წესრიგს ძალოვანი კარნახობს", - განაცხადა საქართველოს პრეზიდენტმა ტოკ-შოუ პირველებში, ბოლო დროს მიმდინარე მოვლენებზე საუბრისას.

მისი თქმით, მოთხოვნა სისტემის დანგრევის შესახებ გასდევს გასდევს საქართველოს ისტორიას.

"როდესაც სამართალდამცავი შენ ზურგს გიმაგრებს და შენ ხან ხერხემალს ეძახი და ხან სხვა ფუნქციას მიანიჭებ, შენს მიერ პასუხის მოთხოვნის რეჟიმიც სუსტდება", - განაცხადა პრეზიდენტმა ხელისუფლებასა და სამართალდამცავი უწყებების კავშირზე საუბრისას.