პრემიერ ლიგის მიმდინარე სეზონი დასასრულს მიუახლოვდა.

დამყარდა არაერთი რეკორდი, 22-წლიანი კარიერა დაასრულა არსენ ვენგერმა და ითქვა არაერთი საინტერესო თუ ემოციური ფრაზა. ჩვენც ყურადღება ამ უკანასკნელზე შევაჩეროთ.

პრემიერლიგის მიმდინარე სეზონის გამონათქვამები:

"შეგვიძლია საერთოდ შევწყვიტოთ ინტერვიუ, რადგან საუბარი მხოლოდ იმ ადამიანებთან მსურს, რომლებსაც ცოტა რამ მაინც გაეგებათ ფეხბურთზე".

იურგენ კლოპის რეაქცია Sky Sports-ის ჟურნალისტის კითხვაზე, რომელიც დეკემბრის მერსესაიდულ დერბიში დანიშნულ პენალტზე დაისვა.

ფოტო: Sky Sports

"მინდა გულშემატკივრებს ვუთხრა, რომ მათ აქვს უფლება ჰქონდეთ განსხვავებული აზრი და რეაქცია, მაგრამ არსებობს რაღაც, რასაც "საფეხბურთო მემკვიდრეობას" ვუწოდებ. არ ვიცი ეს სიტყვა რამდენად სწორად გადმოსცემს ჩემს სათქმელს, რადგან ინგლისურ ენაზე პორტუგალიურიდან ვთარგმნი".

"ბოლო შვიდი წლის განმავლობაში (პრემიერლიგაში) მანჩესტერ სიტის ყველაზე ცუდი პოზიცია მეოთხე ადგილი იყო. ამ პერიოდში მათ ორჯერ მოახერხეს ჩემპიონობა. მემკვიდრეობა სწორედ ეს არის".

"და კიდევ იცით რა არის? ეს ოტამენდი, კევინ დე ბრუინი, ფერნანდინიო, სილვა, სტერლინგი, აგუეროა. ისინი წარსულის ინვესტიციის შედეგს წარმოადგენენ და არა ბოლო 2 წლის".

მცირე ნაწყვეტი მოურინიოს 12 წუთიანი კომენტარიდან, რომელიც ჩემპიონთა ლიგიდან გამოვარდნის შემდეგ (სევილიასთან მარცხი) ითქვა.

ფოტო: ManUtd.com

"ეს ფეხბურთის უბრალოდ ყურებაზე მეტია, ეს ცხოვრების სტილია. ეს არის ზრუნვა ლამაზ ფეხბურთსა და ღირებულებებზე".

ემირეითსზე ჩატარებული ბოლო მატჩის შემდეგ არსენ ვენგერმა არსენალის ფილოსოფია გააანალიზა.

ფოტო: Sky News

"ჩვენ ისეთი სეზონი გვაქვს, როგორსაც ვიმსახურებთ. ეს იმის ბრალია, რომ ბოლო 2-3 წლის განმავლობაში უმნიშვნელოვანესი ფეხბურთელები დავკარგეთ. როცა გამოცდილ და ქარიზმატულ ფეხბურთელებს კარგავ, ამას მძიმე შედეგები მოსდევს".

ანტონიო კონტე აპრილში "არისტოკრატების" სეზონს განიხილავს.

ფოტო: VOA Somali

"როგორც უკვე გითხარით, ლომების გამოჯანმრთელების პროცესი ადამიანებისას არ ჰგავს. ის, რასაც ადრე ვამბობდი, ახლა ფაქტითაც დავამტკიცე. ბედნიერი ვარ, რომ ისევ შემიძლია ვირბინო და "აბრაკადაბრა" ჯადოქრობები ვაკეთო".

ზლატან იბრაჰიმოვიჩი ტრავმის მალე მოშუშებისა და დაბრუნების შემდეგ.