თბილისის მერის კახა კალაძის თქმით, ყველა ადამიანი უნდა დაისაჯოს, ვინც ნარკოტიკების რეალიზებას ხელს უწყობს.

მისი თქმით, სახელმწიფო იქნება პრინციპული და კანონი ყველას მიმართ ერთნაირად იმუშავებს.

"ყველა დამნაშავე დაისჯება, ვინც არ უნდა იყოს, პოლიციელის ძმა, ბიძა თუ ბიცოლა, არ აქვს მნიშვნელობა. კანონი არის ყველასთვის უზენაესი და ჩვენ არაერთი მაგალითი შეგვიძლია მოვიყვანოთ, რომ ასეთი მიდგომები არ გვახასიათებს, ვინც დაარღვევს კანონს ყველა დაისჯება", - განაცხადა კახა კალაძემ.

ბოლო ორ კვირაში უცნობი ნარკოტიკული საშუალების მოხმარებით 5 ადამიანი გარდაიცვალა, ინტოქსიკაციის ნიშნებით კი სამედიცინო დაწესებულებაში 10-მდე ადამიანი გადაიყვანეს.

შშს-მ 8 მაისს გამართულ ბრიფინგზე განაცხადა, რომ ნარკოტიკების ონლაინგზით გავრცელების მარშრუტი დაადგინა და ბრალდებულები დააკავა.

ნარკოტიკების მომხმარებელთა ასოციაციამ კი პრესკონფერენცია გამართა და განაცხადა, რომ თუ პარლამენტი ნარკოპოლიტიკის რეფორმას დროულად არ განახორციელებს შიმშილობას დაიწყებენ.