აშშ–ს სახელმწიფო მდივანმა ჯონ კერიმ 18 ივლისს განაცხადა, რომ ნატო კრიტიკულად დააკვირდება თურქეთის ქმედებებს, იქნება თუ არა სამხედრო გადატრიალების მცდელობა გამოძიებული დემოკრატიული პრინციპების შესაბამისად. კერი არ დამუქრებია თურქეთს ნატოს წევრობის შესაძლო დაკარგვით. თავდაპირველად ინდეფენდენტმა და ვაშინგტონ პოსტმა დაწერეს, თითქოს, ჯონ კერიმ თურქეთს მიანიშნა ნატოს წევრობის შესაძლო დაკარგვაზე, თუ პროცესებს არადემოკრატიულად წარმართავდა. On.ge სწორედ ამ გამოცემებს დაეყრდნო. მოგვიანებით, ვაშინგტონ პოსტმა მცდარი ინფორმაცია გაასწორა.

თურქეთის მთავრობის მოქმედებებს ყურადღებით აკვირდება როგორც ამერიკის შეერთებული შტატები, ასევე ევროკავშირი.

18 ივლისის კონფერენციაზე, რომელსაც საგარეო საქმეთა და უსაფრთხოების პოლიტიკის საკითხებში ევროკავშირის უმაღლესი წარმომადგენელი ფედერიკა მოგერინიც ესწრებოდა, ჯონ კერიმ განაცხადა, რომ ამერიკა მხარს უჭერს დემოკრატიული წესებით არჩეულ მთავრობას, თუმცა აუცილებელია მათ შეასრულონ ის ვალდებულებები, რასაც NATO აკისრებს:

"თურქეთის მიერ არჩეული მთავრობის მიმართ ჩვენი მხარდაჭერა ურყევია, თუმცა ჩვენ ვითხოვთ მისგან შეასრულოს უმაღლესი სტანდარტები და პატივი სცეს მოქალაქეების დემოკრატიულ ინსტიტუტებს და კანონმდებლობას".

კერის თქმით, ამერიკა მხარს უჭერს აჯანყებულების გასამართლებას, თუმცა უმნიშვნელოვანესია დაცული იყოს დემოკრატია, რაც ერთ-ერთი მთავარი პრინციპია, რომელზეც ნატო დგას.