CNN-ის ინფორმაციით, თურქეთის პრეზიდენტი, რეჯეპ ტაიპ ერდოღანი აშშ-ს ფეტულა გულენის დაპატიმრებას ან მის ექსტრადირებას სთხოვს, რადგან სწორედ მას ადანაშაულებს თურქეთში 15 ივლისს დაწყებული ხელისუფლების გადატრიალების მცდელობის ორგანიზებაში. ერდოღანმა ასევე განმარტა, რომ გულენის მოძრაობამ შეერთებული შტატები მნიშვნელოვნად დააზიანა:

"მოვუწოდებ აშშ-ს და ბარაკ ობამას ან დააპატიმროს ფეტულა გულენი, ან დააბრუნოს ის თურქეთში".

ერდოღანმა აშშ-ს გულენის დასჯაში მონაწილეობა მას შემდეგ სთხოვა, რაც თურქეთის მთავრობამ ინჯირლიკის ავიაბაზა, რომელზეც თურქეთი აშშ-ს საშუალებას აძლევს, რომ ISIS-ისა და ერაყის წინააღმდეგ ოპერაცია დაიწყოს, დახურა.

თავის მხრივ პენსილვანიაში მცხოვრები ფეტულა გულენი, რომელიც სახალხო მოძრაობა - Hizmet-ს უდგას სათავეში, უარყოფს თურქეთში მომხდარ არეულობაში მის ჩართულობას და აღნიშნავს, რომ სახელმწიფო გადატრიალების მცდელობა როგორც ნაციონალისტებს, ისე ოპოზიციას შეიძლება ჰქონოდა.

ბოლო მონაცემებით, მას შემდეგ, რაც თურქეთის ხელისუფლების გადატრიალების მცდელობა წარუმატებლად დასრულდა, თანამდებობა დაატოვებინეს 2,745 მოსამართლეს, დაკავებულია 140 მათგანი.

დაპატიმრებულებს შორის არიან სამხედრო მეთაურები, მათ შორის მეორე არმიის ხელმძღვანელიც, რომელიც საზღვარს სირიასთან, ერაყთან და ირანთან იცავს. ამასთან, ასობით სამხედრო პირი, რომლებსაც ბრალს გადატრიალების მონაწილეობაში სდებენ, ანკარაში გადაიყვანეს.

Reuters-ის ცნობით, გარდაცვლილია სულ ცოტა 265 ადამიანი, საიდანაც 161 მშვიდობიანი მოქალაქე ან პოლიციელი, დანარჩენი 104 კი გადატრიალებაში მონაწილე პირია. დაშავდა 1 000-ზე მეტი ადამიანი.

როგორც ერდოღანმა განაცხადა, გადატრიალების მცდელობაში მონაწილეებს მომხდარი "ძვირად დაუჯდებათ":

"ეს იქნება მიზეზი იმისთვის, რომ დავიწყოთ არმიის წმენდვა".