შაბათს, რუსეთმა ხელი მოაწერა ევროპის საბჭოს ხელშეკრულებას, რომელიც ფეხბურთის მოძალადე გულშემატკივრებს ქვეყნის დატოვებას შეუზღუდავს. ინფორმაციას The Moscow Times რუსულ საინფორმაციო სააგენტო RIA Novosti-ზე დაყრდნობით ავრცელებს.

ხელშეკრულება, რომელსაც 14-მა ქვეყანამ მოაწერა ხელი, ადგენს, რომ საზღვარგარეთ მოგზაურობა შეეზღუდება ყველას, ვინც ფეხბურთის მატჩების დროს დაარღვევს საზოგადოებრივ წესრიგს, ან ჩაიდენს დანაშაულს.

დოკუმენტი ამბობს, რომ შეზღუდვები გავრცელდება რამდენიმე რუს გულშემატკივარზე, მათ შორის მათზე, ვინც გასულ თვეში საფრანგეთსა და გერმანიაში დააპატიმრეს.

ხელშეკრულების ხელმომწერები ერთმანეთში გაცვლიან ინფორმაციას, როგორიცაა გულშემატკივართა პერსონალური მონაცემები. ასევე მატჩებზე უსაფრთხოების შენარჩუნებისთვის პოლიციის თანამშრომლობაზე შეთანხმდნენ.

გაზეთი Kommersant-ის ინფორმაციით, კიდევ 10 ქვეყანა განიხილავს დოკუმენტზე ხელმოწერას.

გასულ თვეში რუსეთის სახელმწიფო დუმამ დაადასტურა შავი სიის შექმნა რუსეთის ყველაზე საშიში ფანებისთვის, რომლებიც მასობრივ სპორტულ ღონისძიებებზე დასწრებას ვეღარ შეძლებენ.