კურიერის ინფორმაციით, აჭარის მთავრობის ყოფილი მეთაური, ლევან ვარშალომიძე, დღეს საქართველოში ბრუნდება. ის აჭარის ავტონომიური რესპუბლიკის უმაღლესი საბჭოს არჩევნებში მონაწილეობის მისაღებად ჩამოდის და მისი მიზანია ახალ გუნდთან ერთად სხვადასხვა პროექტების განხორციელება.

ვარშალომიძე არ გამორიცხავს, რომ საქართველოში დაბრუნების შემდეგ მისი დაკითხვები გაგრძელდეს თანამდებობრივი უფლებამოსილების ბოროტად გამოყენებასთან და კულტურული მემკვიდრეობის დაზიანების ფაქტებთან დაკავშირებით. აღსანიშნავია, რომ ვარშალომიძეს არც ერთ საქმეზე ბრალი წარდგენილი არ აქვს.

დევნილთა და განსახლების მინისტრი, სოზარ სუბარი კი განმარტავს, რომ ვარშალომიძე არც საქართველოში და არც მის ფარგლებს გარეთ ყოფნის დროს წარმოადგენდა პოლიტიკურ საფრთხეს:

"მე არ ვიცი, რა დანაშაული აქვს ჩადენილი ვარშალომიძეს. მას ვუსმენდი, რომ არაერთხელ ყოფილა დაკითხვაზე და რახან დაკითხვებზე იბარებდნენ, ესე იგი რაღაც კითხვები მის მიმართ არსებობდა. თვითონ რატომ ეშინია არ ვიცი. ალბათ თვითონ უკეთესად იცის, რა აქვს ჩადენილი და რის მოლოდინი შეიძლება ჰქონდეს. რაც შეეხება პოლიტიკურად, ვარშალომიძე არც აქ ყოფნის დროს წარმოადგენდა რამეს და არც მომავალში რამე საფრთხე მისგან არ არსებობს".

ვარშალომიძე აჭარის ავტონომიური რესპუბლის უმაღლესი საბჭოს არჩევნებში, რომელიც 8 ოქტომბერს გაიმართება, ნაციონალური მოძრაობის სიის პირველი ნომერი იქნება.