აშშ-ის 12-მა შტატმა Paramount-ის მიერ Warner Bros. Discovery-ის შეძენის შესაჩერებლად სასამართლოს მიმართა. სარჩელი მასშტაბური მედიაგაერთიანების წინააღმდეგ ანტიმონოპოლიური დავის დაწყებას ნიშნავს.

Warner Bros. Discovery CNN-ის მშობელი კომპანიაა. გარიგების კრიტიკოსები შეშფოთებას იმის გამო გამოთქვამენ, რომ Paramount შესაძლოა საკაბელო საინფორმაციო არხის მფლობელი გახდეს და ის CBS News-თან გააერთიანოს.

კალიფორნიის გენერალური პროკურორის, რობ ბონტას განცხადებით, მედიაგიგანტების შერწყმა კონკურენციას შეამცირებს, გაზრდის ფასებს, გააუარესებს კონტენტის ხარისხს და ყოველწლიურად ნაკლები ფილმისა და სერიალის შექმნას გამოიწვევს. მისი განცხადებით, შერწყმის შედეგად ამომრჩევლების ინფორმირებაზე ნაკლები ჟურნალისტი იმუშავებს, ამერიკელებს კი სხვადასხვა საკითხზე ინფორმაციისა და მოსაზრებების სრულ სპექტრზე ნაკლები წვდომა ექნებათ, რაც დამოუკიდებელი დასკვნების გამოტანას გაურთულებთ.

რობ ბონტა, კალიფორნიის გენერალური პროკურორი.

ფოტო: X

"ანტიმონოპოლიური კანონების აღსრულება ოლიგარქიის წინააღმდეგ დემოკრატიის დამცავი მექანიზმია", — განაცხადა რობ ბონტამ ჰოლივუდის ნიშნის წინ გამოსვლისას.

Paramount ბრალდებებს უარყოფს. კომპანიის შეფასებით, ის ფაქტობრივადაც და სამართლებრივადაც მცდარია, შტატები კი თანამედროვე გასართობ ინდუსტრიაში არსებულ კონკურენციას არასწორად წარმოაჩენენ. Paramount-ის მტკიცებით, შერწყმა კონკურენციას გააძლიერებს, რადგან Paramount-ისა და Warner Bros. Discovery-ის გაერთიანებით შეიქმნება უფრო ძლიერი, ფინანსურად მყარი და შემოქმედებით სფეროზე ორიენტირებული მედიაკომპანია, რომელიც უკეთ შეძლებს კონკურენცია გაუწიოს ისეთ კომპანიას, როგორიც Netflix-ია.

სარჩელის განხილვას პოლიტიკური მიკერძოების ბრალდებებიც ახლდა. ამის მიზეზად Paramount-ის პრეზიდენტ დონალდ ტრამპთან და მისი ადმინისტრაციის წევრებთან მჭიდრო კავშირები სახელდებოდა.

ლარი ელისონი დონალდ ტრამპთან ერთად თეთრ სახლში, 2025 წლის იანვარი.

ფოტო: Getty Images

Paramount-ის წარმომადგენლები აცხადებენ, რომ შტატების სარჩელი დემოკრატების პოლიტიკური კამპანიის ნაწილია. კომპანიის კრიტიკოსები კი ამტკიცებენ, რომ პოლიტიკურად მოტივირებული თავად შერწყმაა, რადგან CNN-სა და სხვა მედიასაშუალებებზე კონტროლი ტრამპთან დაახლოებულ ელისონების ოჯახს გადაეცემა.

ლარი ელისონს ტრამპის მხარდამჭერი ჯგუფებისთვის ათობით მილიონი დოლარი აქვს შეწირული, დევიდ ელისონს კი პრეზიდენტთან მეგობრული ურთიერთობა აქვს. Paramount ტრამპთან რაიმე ფარულ შეთანხმებას უარყოფს და აცხადებს, რომ CNN-ში ფაქტებზე დაფუძნებული ჟურნალისტიკის შენარჩუნება სურს.

Paramount მედიაგიგანტების შერწყმის დასრულებას ამ ზაფხულს გეგმავს.