სანქტ-პეტერბურგის რაიონულმა სასამართლომ LGBTQ+ თემატიკის გამო 3 ფილმი ოფიციალურად აკრძალა.

სასამართლომ დაადგინა, რომ ფილმები "დესტრუქციულ იდეოლოგიას" ავრცელებს და "არატრადიციული სექსუალური ურთიერთობების მიმართ ინტერესს აჩენს". გადაწყვეტილებაში აღნიშნულია, რომ ფილმების მიზანი LGBTQ+ თემატიკის თავსმოხვევა იყო, რათა საზოგადოებას ამ საკითხზე უარყოფითი განწყობა დადებითით შეეცვალა.

აი, ის 3 ცნობილი ფილმი, რომლებიც რუსეთის მთავრობამ LGBTQ+ შინაარსის გამო აკრძალა:

1. Call Me by Your Name

ტიმოთი შალამე და არმი ჰამერი ფილმში Call Me By Your Name.

ფოტო: Warner Bros.

Call Me by Your Name ეკრანებზე 2017 წელს გამოჩნდა. ფილმში მთავარ როლს ტიმოთი შალამე ასრულებს. 2018 წელს ამ ნამუშევარმა საუკეთესო ადაპტირებული სცენარისთვის ოსკარიც კი მოიგო. ამავე სახელწოდების რომანზე დაფუძნებული ფილმი 17 წლის ელიოს ისტორიას ჰყვება, რომელსაც მამის ასისტენტი — ახალგაზრდა ამერიკელი მკვლევარი უყვარდება.

2. Kill Your Darlings

დენიელ რედკლიფი დრამაში Kill Your Darlings.

ფოტო: Sony Pictures

Kill Your Darlings 2013 წელს გამოვიდა. ფილმში მთავარ როლს დენიელ რედკლიფი ასრულებს და ის ბიტნიკების თაობის ცნობილი მწერლების ცხოვრების ადრეულ, გარდამტეხ პერიოდს აცოცხლებს.

3. Love, Simon

კადრი ფილმიდან Love, Simon.

ფოტო: 20th Century Fox

რაც შეეხება ფილმს Love, Simon, ის მაყურებელმა პირველად 2018 წელს იხილა. 2015 წლის რომანზე დაფუძნებული ფილმი ამერიკელი უფროსკლასელის შესახებ მოგვითხრობს, რომელიც საკუთარ ჰომოსექსუალობას ასაიდუმლოებს.