NASA-ს მისიის, Artemis 2-ის, ასტრონავტებს კაპიტოლიუმის შენობაში შეთქმულების თეორიების მომხრე კაცი დახვდა, რომელიც მათ მთვარის მისიის გაყალბებაში ადანაშაულებდა:

"შეწყვიტეთ ტყუილი! შეწყვიტეთ მსახიობობა! თქვენ კოსმოსში არასდროს ყოფილხართ," — მიაძახა კაცმა ეკიპაჟს რამდენიმე მეტრის მოშორებიდან — "იესოს გზას მიჰყევით! ღმერთი ყველას გიყურებთ".

არტემის 2-ის ეკიპაჟმა შემთხვევისას სიმშვიდე შეინარჩუნა და ცილისწამებას ყურადღება არ მიაქცია. პილოტმა, ვიქტორ გლოვერმა, კაცს ხელი დაუქნია, გაუღიმა და უთხრა: "თავს მიხედე".

1-ელ აპრილს დაწყებული არტემის 2-ის მისია 10 დღე გაგრძელდა, რომლის განმავლობაშიც ასტრონავტებმა მთვარეს გარშემო შემოუარეს.

საკმაოდ უტყუარი ფაქტები არსებობს იმის დასამტკიცებლად, რომ ეს მისია სიცრუე არ ყოფილა: NASA-მ მთლიანი პროცესი, აფრენიდან დაშვებამდე, პირდაპირ ეთერში გადმოსცა, ხომალდის აფრენას კი ფლორიდაში ათასობით ადამიანმა პირადად ადევნა თვალი.

ასევე, არალოგიკურია წარსული, Apollo-ს მთვარის მისიების სიცრუედ წარმოჩენაც, ვინაიდან მთვარის ორბიტის აპარატებმა მთვარის ზედაპირზე Apollo-ს დაშვების ადგილები დააფიქსირეს. მეცნიერები დღემდე იყენებენ იმ რეფლექტორებს, რომლებიც Apollo-ს ასტრონავტებმა მთვარეზე დატოვეს, რათა ლაზერის სხივის არეკვლით დედამიწასა და მთვარეს შორის მანძილი ზუსტად გამოთვალონ.

ამასთან ერთად, ცივი ომის დროს საბჭოთა კავშირს ჰქონდა ტექნიკური შესაძლებლობები იმისთვის, რომ ამერიკული ხომალდებისთვის ეთვალთვალა. Apollo-ს მთვარემდე რომ არ მიეღწია, საბჭოთა კავშირი ამ ინფორმაციას ნამდვილად არ გამოაპარებდა მსოფლიოს.

ასევე იხილეთ: