The Pussycat Dolls იმ მუსიკოსთა გრძელ სიას შეუერთდა, რომლებმაც ბილეთების დაბალი გაყიდვების გამო აშშ-ში დაგეგმილი კონცერტები გააუქმეს. ამ მოვლენას მუსიკალურ ინდუსტრიაში უკვე თავისი სახელი, ლურჯი წერტილების ციებ-ცხელება (blue dot fever), დაერქვა. სახელწოდება იქიდან მომდინარეობს, რომ ბილეთების გასაყიდი ვებგვერდი, Ticketmaster, კონცერტის გაუყიდველ ადგილებს სწორედ ლურჯი წერტილებით აღნიშნავს.

ფოტო: KTLA

ამ პრობლემას ბოლო დროს სხვა მუსიკოსებიც ემსხვერპლნენ: მეგან ტრეინორმა და ზეინმა ამერიკული ტურნეს ყველა კონცერტი გააუქმეს, პოსტ მალონმა და Jelly Roll-მა კი — თავიანთი ერთობლივი სტადიონების ტურნეს მესამედი.

კონცერტების გაუქმების მიზეზად დაბალი მოთხოვნა მხოლოდ The Pussycat Dolls-მა დაასახელა. დანარჩენი მუსიკოსები საბაბად სხვადასხვა მიზეზს, მაგალითად, ჯანმრთელობის მდგომარეობას ან დროის უკმარისობას ასახელებენ, თუმცა აშკარა ფაქტია, რომ გაუქმებამდე მათი კონცერტების ბილეთთა უმრავლესობა არ იყო გაყიდული.

ფოტო: Music Week

რატომ აღარ იყიდება კონცერტების ბილეთები?

ძირითადად იმიტომ, რომ ყველაფერი გაძვირდა:

  • 2026 წელს საკონცერტო ბილეთის საშუალო ფასმა $144-ს მიაღწია, რაც საგრძნობი ნახტომია გასული წლის $115-იან და 2020 წლის $82-იან ნიშნულებთან შედარებით.
  • პარალელურად, ირანის ომის დაწყების შემდეგ, საწვავის ფასები კატასტროფულად გაიზარდა. ამან სერიოზული დარტყმა მიაყენა იმ ტურნეების მოგების მარჟას, რომელთა ლოჯისტიკაც ლოკაციებს შორის ტრანსპორტით გადაადგილებაზეა დამოკიდებული.

გარდა ამისა, წელს გასართობ ინდუსტრიაში დიდი კონკურენციაა: ზაფხულის მთავარი მოვლენა FIFA-ს მსოფლიო ჩემპიონატია, რომელსაც ჩრდილოეთ ამერიკა მასპინძლობს. რაც შეეხება მუსიკას, ისე დაემთხვა, რომ ერთდროულად საკმაოდ ბევრი მუსიკოსი ატარებს ტურნეს.

ფოტო: FIFA

აღსანიშნავია, რომ 3 კვირის წინ ნაფიც მსაჯულთა სასამართლომ Ticketmaster-ის მფლობელი კომპანია, Live Nation, მონოპოლიურ საქმიანობაში დამნაშავედ ცნო. მიუხედავად ამისა, ექსპერტთა ნაწილი მიიჩნევს, რომ ამ გადაწყვეტილებამ შესაძლოა ბილეთების ფასი მაინც არ შეამციროს.