გერმანიაში მცხოვრები სირიელების 80% მომდევნო სამი წლის განმავლობაში სამშობლოში დაბრუნდება, ამის შესახებ გერმანიის კანცლერმა, ფრიდრიხ მერცმა განაცხადა. ბერლინში სირიის პრეზიდენტ აჰმედ ალ შარაასთან შეხვედრის შემდეგ საუბრისას კანცლერმა თქვა, რომ ომის დასრულებიდან ერთ წელზე მეტი ხნის შემდეგ სირიაში მდგომარეობა "საფუძვლიანად შეიცვალა", ამიტომ შესაძლებელია ლტოლვილთა უკან დაბრუნებაზე საუბარი.

მერცის მთავრობამ უფრო მკაცრი პოზიცია დაიკავა ლტოლვილებისა და მიგრანტების მიმართ, განსაკუთრებით მას შემდეგ, რაც ანტიიმიგრაციული პარტიის Alternative for Germany (AFD) მხარდაჭერა გაიზარდა.

კანცლერის თქმით, პირველ ეტაპზე პრიორიტეტი იქნება იმ პირების სირიაში დაბრუნება, რომლებსაც აღარ აქვთ მოქმედი ბინადრობის უფლება.

"მომდევნო სამი წლის პერსპექტივაში, გერმანიაში ამჟამად მცხოვრები სირიელების დაახლოებით 80% მოსალოდნელია, რომ საკუთარ ქვეყანაში დაბრუნდება. ბევრმა სირიელმა ლტოლვილმა მნიშვნელოვანი წვლილი შეიტანა გერმანიის განვითარებაში, თუმცა უმეტესობას სურს სამშობლოში დაბრუნება, სადაც ისინი მნიშვნელოვან როლს შეასრულებენ სირიის აღდგენაში მომდევნო წლებში.” — განაცხადა მერცმა.

კანცლერის თქმით, ეგრმანიის ინტერესებშია, რომ სირიელ ექიმებსა და მომვლელებს დარჩენის შესაძლებლობა ჰქონდეთ, თუ ამას თავად ისურვებენ. თუმცა, ნაკლებად იყო კონკრეტიკა იმასთან დაკავშირებით, თუ როგორ მოხდებოდა დაბრუნების პროცესი.

შეგახსენებთ, რომ გერმანიაში მცხოვრები სირიელების დიდი ნაწილი 2015 წლის ლტოლვილთა კრიზისის დროს ჩავიდა.