დევიდ გილმორის გიტარა Black Strat ხუთშაბათს, ნიუ-იორკში, Christie’s-ის აუქციონზე 14.55 მილიონ დოლარად გაიყიდა. ამით დაფიქსირდა ყველაზე მაღალი ფასი, რაც კი ოდესმე გიტარაში გადაუხდიათ და გაუმჯობესდა 2020 წელს 6 მილიონ დოლარად გაყიდული 1959 წლის Martin D-18E აკუსტიკური გიტარის რეკორდი, რომლითაც კურტ კობეინი Nirvana-ს საკულტო MTV Unplugged კონცერტზე წარსდგა.

გილმორის გიტარა გადამწყვეტი იყო Pink Floyd-ის ისეთი მნიშვნელოვანი ალბომების ჩაწერისას, როგორიცაა: The Dark Side of the Moon (1973), Wish You Were Here (1975), Animals (1977) და The Wall (1979). მან ეს ინსტრუმენტი გამოიყენა სიმღერების, Money და Shine on You Crazy Diamond, ჩაწერისას და თავისი სოლოსთვის კომპოზიციაში Comfortably Numb. აუქციონის დაწყებამდე ვარაუდობდნენ, რომ მისი ფასი 2-დან 4 მილიონ დოლარამდე იქნებოდა.

Christie's-ის მუსიკალური ინსტრუმენტების სპეციალისტს ხელში უჭირავს დევიდ გილმორის გიტარა Black Strat და რომელსაც გილმორი Pink Floyd-ის ყველაზე ცნობილი ჩანაწერების დროს იყენებდა, 2019 წელი

ფოტო: JOHANNES EISELE/AFP/Getty Images

Christie’s-ის აუქციონი The Jim Irsay Collection 3 მარტიდან 17 მარტამდე გრძელდება. გაყიდვების ეს სერია დაანონსებულია, როგორც "ოდესმე შეგროვილი მემორაბილიის ერთ-ერთი უდიდესი საგანძური, რომელიც ათწლეულების განმავლობაში სათუთად გროვდებოდა განსვენებული ფილანთროპის, მუსიკის თავგამოდებული მოყვარულის მიერ. გაყიდვებიდან მიღებული შემოსავლის ნაწილი გადაირიცხება იმ საქველმოქმედო ფონდებში, რომლებსაც ჯიმ ირსეი სიცოცხლის განმავლობაში უჭერდა მხარს".

ირსეიმ Black Strat პირველად 2019 წლის ივნისში, Christie’s-ის აუქციონზე, გავრცელებული ინფორმაციით, 5.245 მილიონ დოლარად შეიძინა, რამაც იმ დროისთვის გიტარის გაყიდვის ახალი რეკორდი დაამყარა.