ხანგრძლივი მოლოდინის შემდეგ, გამოვიდა სიმღერა, რომლითაც ჯგუფი ბზიკები ევროვიზიის სცენაზე დაბრუნდება. 2026 წლის ევროფესტივალზე საქართველოს სწორედ საბავშვო ევროვიზიის გამარჯვებულები წარადგენენ, საკონკურსო სიმღერით On Replay.

სიმღერის კომპოზიტორი გიგა კუხიანიძეა, ტექსტი კი ლიზი ჯაფარიძეს, იმავე ლიზი პოპს ეკუთვნის. გიგა კუხიანიძის დაწერილია ოთხივე სიმღერა, რომლებითაც საქართველომ სხვადასხვა წელს საბავშვო ევროვიზიაზე გაიმარჯვა. რაც შეეხება ლიზი პოპს, იგი ჩვენს ქვეყანას 2014 წლის ევროვიზია ჯუნიორზე წარადგენდა, მოგვიანებით კი, 2017 წელს, კონკურსის წამყვანადაც მოგვევლინა.

ბზიკების საევროვიზიო სიმღერის ვიდეოკლიპზე ზაზა ორაშვილმა იმუშავა. პირველი არხის ცნობით, მუსიკის თემა "ხელოვნური ინტელექტი და თანამედროვე ეპოქაში ადამიანის როლია" და, როგორც ორაშვილი ამბობს, ვიდეორგოლიც ამ კონცეფციას ეფუძნება: "რომ ციფრული ტექნოლოგიების დომინირების ეპოქაში ადამიანი უნდა დარჩეს ადამიანად".

ჯგუფმა ბზიკებმა — მარიამ კიკუაშვილმა, გიორგი შიოლაშვილმა და მარიამ თათულაშვილმა — საქართველოს ევროვიზია ჯუნიორზე პირველი გამარჯვება მოუტანა 2008 წელს. ამ ტრიუმფიდან 17 წლის შემდეგ, შარშან დეკემბერში, როცა საბავშვო ევროვიზიას საქართველო უკვე მეორედ მასპინძლობდა, ბზიკები კონკურსზე ისევ გამოჩნდნენ და ახალი სიმღერა We Don't Sleep შეასრულეს, რომელსაც ინტერნეტსივრცეში დიდი გამოხმაურება მოჰყვა: თვითონ სიმღერა ტიკტოკის ტრენდად იქცა, კონკურსის ფანების საკმაო ნაწილი კი გამოთქვამდა სურვილს, ჯგუფი "დიდების" ევროვიზიაზეც ეხილა.

საიუბილეო, რიგით 70-ე ევროვიზიის სიმღერის კონკურსს ავსტრიის დედაქალაქი ვენა უმასპინძლებს. საერთაშორისო მუსიკალურ ფესტივალზე, რომელიც 12, 14 და 16 მაისს გაიმართება, წელს 35 ქვეყანა მონაწილეობს. საქართველო მაყურებლის წინაშე პირველ ნახევარფინალურ ტურში, 12 მაისს წარდგება.

ასევე იხილეთ:

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...