ამერიკელმა კლდეზე მცოცავმა ალექს ჰონოლდმა კვირას ცათამბჯენი Taipei 101 თოკებისა და ნებისმიერი დამცავი აღჭურვილობის გარეშე აიარა. ჰონოლდი 101 სართულიან ცათამბჯენზე დაახლოებით 90 წუთში ავიდა და სახურავიდან გულშემატკივრებს მიესალმა.

ფოტო: ჩიანგ იინგ იინგ / AP

"ისეთი ხედია, დაუჯერებელია, რა ლამაზი დღეა", — თქვა მან — "ძალიან ქარი იყო, და სულ ვფიქრობდი არ გადმოვვარდნილიყავი. ბალანსის დაცვას ვცდილობდი. ეს საოცარი ადგილია, ტაიპეის დანახვის ულამაზესი გზა."

ჰონოლდი, რომელიც ცნობილია იოსემიტის ეროვნული პარკის კლდეზე თოკის გარეშე ასვლით, Taipei 101-ის ერთ კუთხეს აუყვა, ფეხის დასადგმელად მცირე, L-ს ფორმის შვერილებს იყენებდა. პერიოდულად მას უწევდა შენობიდან გამომდგარი დიდი დეკორატიული ელემენტების გვერდის ავლა და გადალახვა, საკუთარი სხეულის ძალით, შიშველი ხელებით.

ალექს ჰონოლდი Taipei 101-ზე თოკების გარეშე მიცოცავს

ფოტო: ჩიანგ იინგ იინგ / AP

ტაივანის დედაქალაქის ამ სიმბოლური შენობის თოკის გარეშე დაპყრობა პირდაპირ ეთერში გადაიცემოდა Netflix-ზე. ასვლა თავდაპირველად შაბათისთვის იყო დაგეგმილი, თუმცა წვიმის გამო 24 საათით გადაიდო.

ჰონოლდისთვის უჩვეულო და თავიდან ცოტა საშიშიც კი აღმოჩნდა გულშემატკივრების დიდი რაოდენობა, მისი ასვლები, როგორც წესი, შორეულ და მიუდგომელ ადგილებში ხდება.

ფოტო: ჩიანგ იინგ იინგ / AP

ასვლამ ერთდროულად აღფრთოვანებაც და შეშფოთებაც გამოიწვია, განსაკუთრებით იმ ეთიკური საკითხების გამო, რომლებიც ასეთ მაღალრისკიან ქმედებას პირდაპირ ეთერში გადაცემასთანაა დაკავშირებული.

ჰონოლდი არ არის პირველი ადამიანი, ვინც Taipei 101 აიარა, თუმცა ის პირველია, ვინც ეს თოკის გარეშე გააკეთა. ფრანგმა კლდეზე მცოცავმა ალან რობერტმა შენობა 2004 წლის შობის დღეს დალაშქრა, მაშინ, როცა ის მსოფლიოს ყველაზე მაღალი შენობა იყო.