იტალია პალესტინის სახელმწიფოს მხოლოდ იმ შემთხვევაში აღიარებს, თუ ყველა ისრაელელი მძევალი გათავისუფლდება და "ჰამასის" მებრძოლი დაჯგუფება გამორიცხული იქნება ნებისმიერი მთავრობის შემადგენლობიდან, — ამის შესახებ იტალიის პრემიერმინისტრმა ჯორჯია მელონიმ განაცხადა. აღნიშნულის შესახებ ინფორმაციას Reuters ავრცელებს.

"მე არ ვარ პალესტინის აღიარების წინააღმდეგი, მაგრამ უნდა დავისახოთ სწორი პრიორიტეტები," — უთხრა მელონიმ ჟურნალისტებს და დაამატა, რომ მისი მთავრობა პარლამენტს ამ საკითხზე რეზოლუციას წარუდგენს.

ნიუ-იორკიდან, სადაც ის გაეროს გენერალურ ასამბლეას ესწრება, მელონიმ ასევე აღნიშნა, რომ საერთაშორისო ზეწოლა "ჰამასზე" უნდა მოხდეს და არა ისრაელზე, რადგან, მისი თქმით, მძევლების დაბრუნებაზე უარის გამო, სწორედ ეს ჯგუფია პასუხისმგებელი ომის დაწყებასა და მისი დასრულების შეფერხებაზე.