დიდი ბრიტანეთის, კანადის, ავსტრალიისა და პორტუგალიის შემდეგ, საფრანგეთმა და ბელგიამაც აღიარეს პალესტინის სახელმწიფო, - ამის შესახებ საფრანგეთის პრეზიდენტმა და ბელგიის პრემიერ-მინისტრმა ნიუ-იორკში განაცხადეს.

საფრანგეთის სახელმწიფოს მეთაურმა, ემანუელ მაკრონმა ორშაბათს, 22 სექტემბერს, ნიუ-იორკში, გაეროს შტაბ-ბინაში სიტყვით გამოვიდა, სადაც საფრანგეთისა და საუდის არაბეთის ინიციატივით სახელმწიფოებისა და მთავრობების მეთაურების მსოფლიო სამიტი იმართება. ფორუმის მთავარი მიზანი ორი სახელმწიფოს, ისრაელისა და პალესტინის, საერთაშორისოდ აღიარებულ საზღვრების შესახებ გადაწყვეტილების მიღწევაა.

"დღეს საფრანგეთი აღიარებს პალესტინის სახელმწიფოს", — თქვა მაკრონმა. მისივე თქმით, ეს კეთდება "ისრაელისა და პალესტინელი ხალხების მშვიდობის სახელით".

საფრანგეთის ლიდერმა ისაუბრა როგორც პალესტინის რადიკალური ისლამისტური მოძრაობის, ჰამასის, მიერ გატაცებული მძევლების საკითხზე, ასევე ისრაელის სამხედრო ოპერაციაზე ღაზას სექტორში.

"დადგა დრო, გავათავისუფლოთ ჰამასის მიერ დაკავებული 48 მძევალი და დავასრულოთ ომი, ღაზაში დაბომბვები, ხოცვა-ჟლეტა და მოსახლეობის გაქცევა", — განაცხადა მაკრონმა.

მოგვიანებით, იმავე შეხვედრის დროს, ბელგიის პრემიერმინისტრმა ბარტ დე ვევერმა, მონაკოს, მალტის და ლუქსემბურგის ლიდერებთან ერთად, პალესტინის სახელმწიფოდ აღიარების შესახებ გამოაცხადა.

გაერთიანებულმა სამეფომ, კანადამ, ავსტრალიამ და პორტუგალიამ 21 სექტემბერს აღიარეს პალესტინის სახელმწიფო.