მმართველი პარტიის, ქართული ოცნების თბილისის მერობის კანდიდატმა, კახა კალაძემ ნაციონალური მოძრაობისა და ევროპული საქართველოს წევრები დეზინფორმაციის გავრცელებაში დაადანაშაულა და თქვა, რომ ისინი მიზანმიმართულად ცდილობენ ბიძინა ივანიშვილის დისკრედიტაციას.

კალაძემ ამომრჩევლისთვის მორიგი ვიდეომიმართვა ჩაწერა, სადაც ამბობს, რომ პუშკინის სკვერთან პარკინგი საინვესტიციო ვალდებულების ფარგლებში მოეწყობა.

"მილიონზე მეტი უნდა დაიხარჯოს რომ მიწისქვეშა პარკინგი მოეწყოს. 10 ლოკაციაა ქალაქში მონიშნული და ამ ათიდან ერთ-ერთი არის ეს კონკრეტული ადგილი".

მერობის კანდიდატი აღნიშნავს იმასაც, რომ პანორამა თბილისის ფარგლებში, თავისუფლების მოედანზე მიმდინარე სასტუმროს მშენებლობაში 400 მილიონი აშშ დოლარი იხარჯება და 15 ათასი ადამიანია დასაქმებული.

კალაძე თაბორის მთაზე დაგეგმილ მშენებლობასაც შეეხო და თქვა, რომ დეზინფორმაციაა, თითქოს, ბიძინა ივანიშვილი ტერიტორიებს ითვისებს. მისი თქმით, რეალურად, სარწყავი სისტემა კეთდება, რათა იქაურ ბუნებას წყალი მიეწოდოს:

"ძალიან პატარა ტერიტორიაზე იქნება სასტუმრო კომპლექსი და ულამაზესი მწვანე სივრცე და გარემო, სადაც ყველას შეეძლება მისვლა".

კახა კალაძე ასევე ამომრჩეველს ჰპირდება, რომ მისი ემრობის პირობებში დეზინფორმაციის გავრცელება:

"პასუხის გამცემიც კი არავინ არ არის და ეს ძალიან საწყენია. ვერავინ ვერ შეაჩერებს განვითარებას და წინსვლას. არავის არ მივცემთ იმის უფლებას, რომ მოატყუოს მოსახლეობა. მართლა არ ბნელა ქვეყანაში, არ არის მხოლოდ პარტია რუსთავი 2, არის სხვა შესაძლებლობები, ინტერნეტი, რაზეც ყველას მიუწვდება ხელი და ჩვენ ამას გამოვიყენებთ".

რა გადაწყვეტილება მიიღო საკრებულომ

თბილისის საკრებულომ ბიძინა ივანიშვილთან დაკავშირებული კომპანიის სასარგებლოდ, პუშკინის სკვერთან 1 946 მ2-ის ფართობის მიწის ნაკვეთის ფუნქციური ზონის სტატუსის შეცვლას მხარი დაუჭირა. გავრცელებული ინფორმაციით, აღნიშნულ კომპანიას პანორამა თბილისის სასტუმროს მიმდებარედ, მიწისქვეშა ავტოსადგომის აშენება სურს და ამ ტერიტორიის 1 ლარად გადაცემას ითხოვს. ასევე, სოლოლაკის ქედზე 4 677 მ2 ტერიტორიას ლანდშაფტური ზონის სტატუსი შეეცვლა და პანორამა თბილისს გოლფის მოედნის დამხმარე სათავსოების ასაშენებლად გადაეცემა.

სხდომის დაწყებამდე დარბაზში მივიდნენ თბილისის მერობის კანდიდატები ევროპული საქართველოდან - ელენე ხოშტარია და ნაციონალური მოძრაობიდან - ზაალ უდუმაშვილი. მათ საკრებულო ბიძინა ივანიშვილის ინტერესების გატარებაში დაადანაშაულეს. საკრებულოს დაცვის თანამშრომლებმა მერობის კანდიდატები და პარტიზანი მებაღე ნატა ფერაძე დარბაზიდან ძალის გამოყენებით გაიყვანეს.