მას შემდეგ, რაც პოლონეთის სამხედრო ძალებმა საკუთარი საჰაერო სივრცეში შეჭრილი რამდენიმე რუსული დრონი ჩამოაგდეს, ვარშავამ NATO-ს ხელშეკრულების მე-4 მუხლი აამოქმედა, რათა მოკავშირეებთან კონსულტაციები გამართოს. ამის შესახებ ინფორმაციას Euronews ავრცელებს.

ჩრდილოატლანტიკური ხელშეკრულების მე-4 მუხლი ითვალისწინებს NATO-ს მოკავშირე ქვეყნებს შორის ერთობლივი კონსულტაციების შესაძლებლობას "როდესაც რომელიმე მათგანის აზრით, საფრთხე ემუქრება რომელიმე მხარის ტერიტორიულ მთლიანობას, პოლიტიკურ დამოუკიდებლობას ან უსაფრთხოებას."

ცნობისთვის, პოლონეთის არმიის ოპერატიული სარდლობის განცხადებით, რუსეთის მიერ უკრაინაზე განხორციელებული თავდასხმის შედეგად, რუსეთმა პოლონეთის საჰაერო სივრცე უპრეცედენტოდ დაარღვია. სარდლობის მიერ გავრცელებულ განცხადებაში აღნიშნულია, რომ რამდენიმე საფრთხის შემცველი დრონი ჩამოაგდეს. ბოლო ინფორმაციით, პოლონეთმა მათ საჰაერო სივრცეში შესული 19 დრონიდან 4 ჩამოაგდო.