თბილისის საქალაქო სასამართლოში აჭარის მთავრობის ყოფილი თავმჯდომარის, თორნიკე რიჟვაძის თვითმკვლელობის მცდელობის საქმეზე, ცეცხლსასროლი იარაღის დაუდევრად შენახვაში ბრალდებულის, საზღვაო ტრანსპორტის სააგენტოს ყოფილი დირექტორის, ალექსი ახვლედიანის სასამართლო პროცესი იწყება.

საზღვაო ტრანსპორტის სააგენტოს ყოფილმა დირექტორმა ჟურნალისტებთან საუბრისას თქვა, რომ თორნიკე რიჟვაძემ დიდ ბრიტანეთში ელჩად წასვლა მოითხოვა, რაზეც თანხმობა მიიღო.

"როდესაც მე მქონდა საშუალება, ყოველთვის შეხვედრებზე დავდიოდით ერთად და ამბობდა რომ აი, მართლაც ამ არჩევნებს რომ ჩავამთავრებ, უნდა მოვითხოვო სადმე გადაყვანა და მეც ასე სიხარულით ვეუბნებოდი, რომ თბილისში გადავიდეთ — მეც დავუბრუნდები ჩემს ქალაქს. მას ძალიან დიდი სურვილი ჰქონდა, რომ თავისი საქმიანობა გაეგრძელებინა დიპლომატიური მიმართულებით.

მე ნამდვილად ვერ გეტყვით — მან უთხრა თუ არა პრემიერს ამის შესახებ. ზუსტად ვიცი, რომ შესაბამის დროს ეძებდა. ნამდვილად არ მკითხავს და არ დამიზუსტებია, მაგრამ როდესაც მისი გათავისუფლება მოხდა, რამდენიმე დღეში ჩამოვიდა თბილისში, როგორც შემდგომ მომიყვა, შეხვდა პრემიერს და შეთანხმდნენ, რომ მას უნდა გაეგრძელებინა მუშაობა, როგორც სურვილი ჰქონდა — დიპლომატიურ სამსახურში. როგორც მან მითხრა, თვითონ მოითხოვა, რომ არის ვაკანსია და თუ იყო შესაძლებელი, ეს ყოფილიყო დიდ ბრიტანეთში, რაზეც მან მიიღო თანხმობა და რატომ ვყვები ამას იცით?

მიუხედავად იმისა, რომ ეს იყო მისი ინიციატივა. მინიმუმ ერთი წელი წელიწადნახევარი, მარტო ჩემთან არა — ძალიან ბევრ ადამიანთან ამას აფიქსირებდა, რომ მისი წასვლის დრო იყო. ხუმრობითაც იძახდა ხოლმე — ბრეჟნევი ხომ არ ვარო", — თქვა ახვლედიანმა "ტვ პირველთან".

2025 წლის 7 ივლისს, საგარეჯოს "ჯეოჰოსპიტალსში" აჭარის ავტონომიური რესპუბლიკის მთავრობის ყოფილი თავმჯდომარე თორნიკე რიჟვაძე შეიყვანეს, რომელსაც გულმკერდის არეში ცეცხლნასროლი ჭრილობა აღენიშნებოდა. შინაგან საქმეთა სამინისტროში გამოძიება სისხლის სამართლის კოდექსის 115-ე მუხლით არის დაწყებული, რაც თვითმკვლელობამდე მიყვანას გულისხმობს. ამჟამად ის თურქეთის ერთ-ერთ კლინიკაში მკურნალობს.

რაც შეეხება ლექსი ახვლედიანს, ის 7 ივლისს, აჭარის ავტონომიური რესპუბლიკის ყოფილი თავმჯდომარის, თორნიკე რიჟვაძის თვითმკვლელობის მცდელობის საქმეზე, ცეცხლსასროლი იარაღის დაუდევრად შენახვისთვის, საქართველოს სისხლის სამართლის კოდექსის 238-ე მუხლით, დააკავეს. 8 ივლისს კი 30 000-ლარიანი გირაოს სანაცვლოდ სასამართლო დარბაზიდან გაათავისუფლეს.