ვინ იფიქრებდა, რომ ბილი აილიშის მორიგი კოლაბორაცია, არც მეტი, არც ნაკლები, ჯეიმს კამერონთან შედგებოდა?! ამერიკელმა პოპვარსკვლავმა სულ ახლახან დააანონსა, რომ ცნობილ კანადელ რეჟისორთან ერთად ახალ პროექტზე მუშაობს. ის ამბავი კი ალბათ არ უნდა იყოს გასაკვირი, რომ ავატარის რეჟისორის ეს სიახლეც 3D ტექნოლოგიას უკავშირდება...

"ალბათ შენიშნეთ, რომ უჩვეულოდ ბევრი კამერა გვახვევია თავს", — განაცხადა აილიშმა მანჩესტერში გამართულ კონცერტზე, — "ბევრს ვერაფერს გეტყვით, მაგრამ გაგიმხელთ, რომ რაღაც ძალიან, ძალიან განსაკუთრებულზე ვმუშაობ ჯეიმს კამერონთან ერთად და ეს 3D პროექტი იქნება. მე და თქვენ ამ ყველაფრის მონაწილენი ვიქნებით. სხვათა შორის, თავადაც აქ არის ახლა. თუმცა, ყურადღებას ნუ მიაქცევთ, ნურც მას და ნურც იმ ფაქტს, რომ მომდევნო ოთხი დღე ზუსტად ეს სამოსი მეცმევა".

ფოტო: Axelle / Bauer-Griffin / FilmMagic

აილიში კინოინდუსტრიასთან აქამდეც გადაკვეთილა. მოკლემეტრაჟიან ნამუშევრებთან ერთად, 23 წლის მომღერალზე გადაღებულია დოკუმენტური ფილმი Billie Eilish: The World’s a Little Blurry (2021) და საკონცერტო ფილმი Happier Than Ever: A Love Letter to Los Angeles (2021). აილიშს ასევე დაწერილი აქვს სიმღერები ფილმებისთვის No Time to Die და Barbie; ორივე სიმღერამ მუსიკოსს ოსკარი მოუტანა. ამჟამად პოპვარსკვლავი შარშან გამოშვებული მესამე სტუდიური ალბომის, Hit Me Hard and Soft-ის, პრომო ტურნეს მართავს.

რაც შეეხება კამერონს, მისი მორიგი ნამუშევარია ავატარის სერიის მესამე ფილმი, Avatar: Fire and Ash, რომლის პრემიერაც 19 დეკემბერს შედგება.

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...