ჯასტინ ბიბერის გულშემატკივრებისთვის სასიამოვნო სიახლე გვაქვს, თითქმის, 4-წლიანი პაუზის შემდეგ, მუსიკოსი ახალი მუსიკალური ალბომით დაბრუნდა.

აღსანიშნავია, რომ ბიბერმა თავისი მეშვიდე სტუდიური ალბომი — Swag — დაანონსებიდან სულ რაღაც ერთ საათში გამოუშვა.

ფოტო: Justin Bieber/ Instagram

31 წლის მუსიკოსისთვის ბევრი რამ შეიცვალა მას შემდეგ, რაც 2021 წელს ბოლო სტუდიური ალბომი — Justice — გამოუშვა. მან 2022 წელს მსოფლიო ტურნეებისგან დიდხნიანი შესვენება აიღო და 131-დღიანი მსოფლიო ტურნეს დარჩენილი 82 კონცერტი გააუქმა.

"კონცერტის დასრულების შემდეგ, ძალიან დავიღალე და მივხვდი, რომ ჩემი ჯანმრთელობა უნდა დამეპრიორიტეტებინა", — თქვა ჯასტინმა კონცერტების გაუქმების შემდეგ — "ამიტომ, ტურნეებისგან დროებით შესვენებას ავიღებ, კარგად ვიქნები, მაგრამ დასვენებისა და გამოჯანმრთელებისთვის დრო მჭირდება".

რაც შეეხება Swag-ს, ალბომი 21 სიმღერას მოიცავს და ინტროსპექტიული ჟღერადობით გამოირჩევა, სადაც ის ცოლისა და შვილისადმი ერთგულებაზე, მენტალურ ჯანმრთელობასა და ცხოვრების რთულ ეტაპებზე საუბრობს.

ალბომში მუსიკოსს კოლაბორაცია აქვს ისეთ მუსიკოსებთან, როგორებიც არიან — Sexyy Red, Druski, Dijon, Lil B, Cash Cobain, ედი ბენჯამინი და მარვინ ვაინანსი.

ფოტო: Justin Bieber/IG

ფოტო: Justin Bieber/ IG

რამდენიმე დღის წინ ბიბერის გულშემატკივრებმა მსოფლიოს სხვადასხვა ქალაქებში უცნაური ბილბორდები შენიშნეს, რომლებზეც ჯასტინი და წარწერა Swag იყო გამოსახული. ფანების ვარაუდით ეს იმაზე მიანიშნებდა, რომ მუსიკოსი ახალი ალბომის გამოშვებას გეგმავდა. და მართლაც, ახალი ალბომი იმაზე მალე გამოვიდა, ვიდრე ეს წარმოედგინათ.

Swag-ის გამოსვლამდე რამდენიმე თვით ადრე, ბიბერმა სოციალურ ქსელებში სტუდიიდან გადაღებული ფოტოებიც გაავრცელა. გავრცელებული ინფორმაციით, მან ლოს-ანჯელესში საკუთარ სახლში მუსიკალური სესიები გამართა, რომლებშიც პროდიუსერები კარტერ ლენგი, ედი ბენჯამინი და ტეი ჯეიმსი იყვნენ ჩართულნი.

ჯასტინ ბიბერის ახალი ალბომის მოსმენა როგორც იუთუბზე, ასევე Spotify-ს, Apple Music და Deezer-ს მუსიკალურ პლატფორმებზე არის შესაძლებელი.