წელს, ქალების ლიტერატურული პრემია ნიდერლანდელ ავტორს, იაელ ვან დერ ვუდენს გადაეცა წიგნისთვის თავშესაფარი. წიგნი მეორე მსოფლიო ომის შემდგომ ნიდერლანდებში ვითარდება.

ქალების ლიტერატურული პრემია (Women’s Prize for Fiction) არის დიდ ბრიტანეთში დაწესებული ერთ-ერთი ყველაზე პრესტიჟული ლიტერატურული ჯილდო, რომელიც 1996 წელს შეიქმნა და ყოველწლიურად ავლენს საუკეთესო ინგლისურენოვანი რომანის ავტორ ქალს, რომლის წიგნიც გამოქვეყნებულია დიდ ბრიტანეთში. პრემიის დაარსება უკავშირდება 1991 წლის ბუკერის პრემიას, რომლის მოკლე სიაშიც არც ერთი ქალი ავტორი არ მოხვდა, მიუხედავად იმ წლის განმავლობაში ქალების მიერ გამოცემული ძლიერი ნამუშევრებისა. სწორედ ამის საპასუხოდ, ქალების ხმის გასაძლიერებლად და ლიტერატურულ სივრცეში გენდერული დისბალანსის წინააღმდეგ შეიქმნა ეს ჯილდო. პრემია შეუძლია მიიღოს ნებისმიერმა ავტორმა, თუ მისი წიგნი ინგლისურადაა დაწერილი. გამარჯვებული იღებს £30,000-ს და ბრინჯაოს ქანდაკებას სახელად ბესი.

ჟიურის წევრებმა წიგნი შეაფასეს, როგორც "შესანიშნავი დებიუტი... ისტორიის, მღელვარებისა და ავთენტურობის შესანიშნავი ნარევი".

სიუჟეტი მოგვითხრობს კარჩაკეტილ ქალზე, რომელსაც თავისი ძმა ჰკითხავს, შეუძლია თუ არა მის შეყვარებულს საზაფხულოდ მასთან დარჩეს. თავდაპირველი შეუგუებლობის შემდგომ, ორ ქალს შორის ურთიერთობა თანდათან უმჯობესდება.

ამის პარალელურად, ქალთა პრემია არამხატვრულ ლიტერატურაში მიიღო ექიმმა რეიჩელ კლერკმა წიგნისთის ერთი გულის ამბავი, სადაც იგი იკვლევს ორგანოს დონაციის სხვადასხვა მხარეს მყოფი ორი ოჯახის მდგომარეობას.

გამარჯვებულები ხუთშაბათს, ლონდონში გამართულ ცერემონიაზე გამოვლინდნენ. პრემიის სახით თითოეული £30,000-ს მიიღებს.

მწერალმა კიტ დე ვაალმა, მხატვრული ლიტერატურის ნომინაციის ჟიურის თავმჯდომარემ, თავშესაფარი აღწერა როგორც მომავლის კლასიკა, რომელსაც მომდევნო თაობები შეიყვარებენ და დააფასებენ.

"ასეთი წიგნები ყოველ დღე არ იწერება" — თქვა მან — "თითოეული სიტყვა იდეალურადაა შერჩეული, ყოველი მომდევნო გვერდი ომისა და ჰოლოკოსტის იმ ასპექტებს ამჟღავნებს, რასაც აქამდე იშვიათად იკვლევდნენ მხატვრულ ტექსტებში. ეს ასევე არის სასიყვარულო ამბავი, საუცხოოდ გადმოცემული ინტიმური სცენებით, რომლებიც დახვეწილი და მიმზიდველი ეროტიკულობითაა აღწერილი".

ერთი გულის ამბავი, რომელმაც პრემია არამხატვრული ლიტერატურის დარგში აიღო, მოგვითხრობს ორი ოჯახის ამბავზე, რომლებიც ორგანოს დონაციაში არიან ჩართულნი.

9 წლის გოგონა, სახელად კირა, რომელიც ავტოავარიაში იღუპება და 9 წლის ბიჭი, მაქსი, რომელსაც ვირუსული ინფექციის გამო გულის უკმარისობა აწუხებს - სიუჟეტი ამ ორი ბავშვის ოჯახებზე მოგვითხრობს.

ეს წიგნი აღწერს იმ სამედიცინო პერსონალის პროფესიონალიზმსა და მზრუნველობას, რომლებიც კირას უკანასკნელ საათებში უვლიან და მისი ორგანოებით მაქსს ახალ სიცოცხლეს სთავაზობენ.

კავიტა პურის, არამხატვრული ლიტერატურის ნომინაციის ჟიურის თავმჯდომარის თქმით, ამ წიგნმა ღრმა და წარუშლელი შთაბეჭდილება დატოვა ჟიურის წევრებზე.

"კლერკის ნაშრომი ავტორიტეტული, შესანიშნავი, ალტრუისტული ტექსტია. კვლევა ზუსტი, ხოლო თხრობა დახვეწილია" — თქვა მან - "ის ზედმიწევნით ფრთხილად კრავს ამ შესანიშნავ ამბავს, თავშეკავებულად გვიამბობს მასზე და თავისუფლად აქსოვს მასში ტრანსპლანტაციის ოპერაციის ისტორიას"

2024 წელს ITV-მ ექიმი კლარკის მეოთხე წიგნი სერიალად აქცია.

ქალთა პრემია მხატვრული ლიტერატურისთვის - ნომინანტთა სია

• კარგი გოგო - არია აბერი
• ცოცვა - მირანდა ჯულაი
• სპარსელები - სანამ მაჰლუჯი
• ყველაფერი მომიყევი - ელიზაბეტ სტრაუტი
• თავშესაფარი - იაელ ვან დერ ვუდენი
• საზრისი - ნუსაიბა იუნისი

ქალთა პრემია არამხატვრული ლიტერატურისთვის - ნომინანტთა სია

• გადახლართული - ნენე ჩერი
• ერთი გულის ამბავი: ორი ოჯახი, ერთი გული და სამედიცინო სასწაული - რეიჩელ კლარკი.
• კურდღლის აღზრდა - ქლოე დალტონი
• აგენტი ზო: მეორე მსოფლიო ომის წინააღმდეგობის უშიშარი მებრძოლის უცნობი ამბავი - კლერ მალლი
• რად შეიძლება იქცეს ველური ზღვა: მსოფლიო ოკეანის მომავალი - ჰელენ სკეილსი.
• პირადი რევოლუციები: ოთხი ქალი ჩინეთის ახალი საზოგადოებრივი წყობის პირისპირ - იუან იანგი.