ქართული ოცნების ახალი თავმჯდომარე ირაკლი კობახიძე იქნება. ამის შესახებ პარტიის ყრილობაზე ცოტა ხნის წინ გახდა ცნობილი.

ქართული ოცნების ყრილობა 18 წუთს გაგრძელდა და სიტყვით გამოვიდნენ: პარტიის ახალი თავმჯდომარე ირაკლი კობახიძე, პარტიის აღმასრულებელი მდივანი მამუკა მდინარაძე და აირჩიეს პოლიტსაბჭოს განახლებული შემადგენლობა.

ირაკლი კობახიძემ სიტყვით გამოსვლისას მადლობა გადაუხადა ქართული ოცნების წარმომადგენლებს მხარდაჭერისთვის, განსაკუთრებით გამოყო ირაკლი ღარიბაშვილის დამსახურება და "უდიდესი მადლობა" გადაუხადა ბიძინა ივანიშვილს.

"მინდა მადლობა გადავუხადო ირაკლი ღარიბაშვილს, რომელიც ბოლო 1.5 წლის განმავლობაში თავმჯდომარეობდა პარტიას და მნიშვნელოვანი წვლილი შეიტანა გასულ წელს ჩვენი პარტიის საარჩევნო წარმატებაში. ასევე, მადლობა მინდა მას გადავუხადო ყველა იმ დამსახურებისთვის, რომელიც ქვეყნისა და პოლიტიკური გუნდის წინაშე უმაღლეს პოლიტიკურ თანამდებობებზე მრავალწლიანი მოღვაწეობისას მიუძღვის.

ახლახან შესრულდა 13 წელი „ქართული ოცნების“ დაფუძნებიდან. ეს იყო საქართველოს დამოუკიდებლობისთვის, მშვიდობიანი განვითარებისთვის, კეთილდღეობისთვის, ქართველი ხალხის ღირსების დაცვისთვის უთანასწორო, მაგრამ მართალი და წარმატებული ბრძოლის 13 წელიწადი. ამ ბრძოლას საფუძველი ჩაუყარა ჩვენი პარტიის დამფუძნებელმა და საპატიო თავმჯდომარემ, ბიძინა ივანიშვილმა. თავს უფლებას მივცემ და თითოეული თქვენგანის სახელით მას გადავუხდი უდიდეს მადლობას ქართული საქმის კეთებისთვის, მადლობა სამშობლოსთვის თავდადებისთვის, მადლობა უდიდესი სიბრძნით, შორსმჭვრეტელობითა და მოთმინებით ქართული საქმის კეთებისთვის, საქართველოში ავტორიტარიზმის დასრულებისა და ქვეყანაში დემოკრატიის, სამართლებრივი სახელმწიფოსა და ადამიანის უფლებების განმტკიცებისთვის.

ბიძინა ივანიშვილის დამსახურებაა, რომ დღეს საქართველოს ჰყავს პირველი ხელისუფლება დამოუკიდებლობის აღდგენის შემდეგ, რომლის პირობებშიც, ჩვენს ქვეყანას ომი არ ჰქონია და ჩვენ გვქონდა უწყვეტი 13-წლიანი მშვიდობა", — განაცხადა ირაკლი კობახიძემ ქართული ოცნების ყრილობაზე, სადაც ის პარტიის თავმჯდომარედ აირჩიეს.

ამის შემდეგ ირაკლი კობახიძემ პარტიის პოლიტიკური საბჭოს შემადგენლობა დაასახელა.

კობახიძის თქმით, პარტიის პოლიტიკური საბჭო დაკომპლექტებულია 15 წევრისგან. მის შემადგენლობაში არიან:

პარტიის საპატიო თავმჯდომარე ბიძინა ივანიშვილი,

პარტიის თავმჯდომარე ირაკლი კობახიძე,

პარტიის გენერალური მდივანი კახა კალაძე იქნება,

პარლამენტის თავმჯდომარე შალვა პაპუაშვილი,

პარტიის აღმასრულებელი მდივანი მამუკა მდინარაძე,

პარლამენტის თავმჯდომარის პირველი მოადგილე გიორგი ვოლსკი,

პარლამენტის თავმჯდომარის მოადგილე თეა წულუკიანი,

ვიცე-პრემიერი, შს მინისტრი ვახტანგ გომელაური,

საქართველოს თავდაცვის მინისტრ ირაკლი ჩიქოვანი,

საქართველოს საგარეო საქმეთა მინისტრი მაკა ბოჭორიშვილი,

პარლამენტის საგარეო ურთიერთობათა კომიტეტის თავმჯდომარე ნიკოლოზ სამხარაძე,

ეკონომიკისა და მდგრადი განვითარების მინისტრის მოადგილე მარიამ ქვრივიშვილი,

პარტიის რეგიონული მდივანი დიმიტრი სამხარაძე,

პარტიის აჭარის ორგანიზაციის თავმჯდომარე სულხან თამაზაშვილი,

პარტიის ქალთა ორგანიზაციის თავმჯდომარე ნინო წილოსანი.

შეგახსენებთ, რომ პარტია ქართული ოცნების თავმჯდომარის თანამდებობა ვაკანტური მას შემდეგ გახდა, რაც ირაკლი ღარიბაშვილმა პარტიიდან და პოლიტიკიდან წასვლის შესახებ განცხადება გააკეთა.

აღსანიშნავია, რომ ის ამ თანამდებობაზე მეორედ იქნა არჩეული. ის პარტია ქართული ოცნების თავმჯდომარე 2021 წლის 16 იანვრიდან 2024 წლის 24 იანვრამდეც იყო.