აშშ გამოდის ჯგუფიდან, რომელიც რუსეთის უკრაინაში შეჭრაზე პასუხისმგებლობას იძიებს - ამის შესახებ ინფორმაციას NYT ავრცელებს.

აშშ-ის იუსტიციის დეპარტამენტმა ევროპულ ქვეყნებს აცნობა აშშ-ის საერთაშორისო ჯგუფიდან გასვლის შესახებ, რომელიც რუსეთ-უკრაინის ომში რუსეთის სამხედრო დანაშაულს იძიებს.

საუბარია უკრაინის წინააღმდეგ დანაშაულთა გამოძიების საერთაშორისო ცენტრზე (ICPA), რომელიც მდებარეობს ჰააგაში და რომელსაც შეერთებული შტატები 2023 წელს შეუერთდა. ვაშინგტონმა საგამოძიებო ჯგუფიდან გასვლა რესურსების გადანაწილებით ახსნა.

NYT წერს, რომ ევროპელი ოფიციალურ პირებს საგამოძიებო ჯგუფიდან აშშ-ის გასვლის შესახებ უკვე აცნობეს.

აღსანიშნავია, რომ საგამოძიებო ჯგუფი ასევე აწარმოებს გამოძიებას ბელორუსის, ჩრდილოეთ კორეისა და ირანის ხელმძღვანელობის მიმართ. შეერთებული შტატები იყო ერთადერთი ქვეყანა ევროპის გარეთ, რომელიც თანამშრომლობდა ჯგუფთან, გაგზავნა იუსტიციის დეპარტამენტის უფროსი პროკურორი ჰააგაში უკრაინელ გამომძიებლებთან და მათ კოლეგებთან ბალტიისპირეთის ქვეყნებიდან და რუმინეთიდან.

რუსული მედია წერს, რომ რუსეთს სამხედრო დანაშაული არ ჩაუდენია და რუსეთმა არაერთხელ უარყო ბრალდებები უკრაინაში სამხედრო დანაშაულებში მონაწილეობის შესახებ.

2022 წლის ნოემბერში, ევროკომისიის პრეზიდენტმა ურსულა ფონ დერ ლაიენმა დააყენა წინადადება, გაეროს მხარდაჭერით, ევროკავშირში სპეციალიზებული სასამართლოს შექმნის შესახებ, რომელიც გამოიძიებდა უკრაინაში ომის დანაშაულებს. 2023 წლის 4 მარტს ხელი მოეწერა შეთანხმებას ჰააგაში უკრაინის წინააღმდეგ დანაშაულთა გამოძიების საერთაშორისო ცენტრის შექმნაზე.