"ერევნის ამჟამინდელი კურსი რუსეთის ინტერესების საწინააღმდეგო კონკრეტულ ქმედებებამდე მიგვიყვანს", — განაცხადა რუსეთის საგარეო საქმეთა სამინისტროს პრესსპიკერმა მარია ზახაროვამ აშშ-ის სახელმწიფო მდივნის, მარკო რუბიოს, სომხეთში ვიზიტთან დაკავშირებით.

"ეს მხოლოდ კიდევ ერთი მაგალითია ოფიციალური ერევნის მიერ დასავლეთის ქვეყნებთან თანამშრომლობის გაძლიერების კონკრეტული ნაბიჯებისა... თუმცა, პრაქტიკაში, ეს ნაბიჯები რუსეთის ინტერესების საწინააღმდეგო კონკრეტულ ქმედებებამდე მიგვიყვანს", — თქვა ზახაროვამ სანქტ-პეტერბურგის საერთაშორისო ეკონომიკური ფორუმზე "რია ნოვოსტისთან" ინტერვიუში.

სანქტ-პეტერბურგის საერთაშორისო ეკონომიკური ფორუმი 3-დან 6 ივნისის ჩათვლით იმართება.

შეგახსენებთ, რომ აშშ-ის სახელმწიფო მდივანმა, მარკო რუბიომ თქვა, რომ TRIPP-ის პროექტს შეუძლია რევოლუცია მოახდინოს სომხეთის სტრატეგიულ პოზიციაში და ის რეგიონში ცენტრალურ სავაჭრო ცენტრად იქცეს.

"ჩვენ ხელი მოვაწერეთ TRIPP-ის შეთანხმებას შეერთებულ შტატებსა და სომხეთს შორის. ვიცი, რომ ეს სომხეთსა და აზერბაიჯანს შორის სამშვიდობო შეთანხმების საფუძველია და ეს მნიშვნელოვანია, მაგრამ ეს გაცილებით მეტია, ვიდრე უბრალოდ სამშვიდობო შეთანხმების საფუძველი. მას ნამდვილად აქვს პოტენციალი, რევოლუცია მოახდინოს სომხეთის სტრატეგიულ პოზიციაში და ის რეგიონში ცენტრალურ სავაჭრო ცენტრად იქცეს. ის წყვეტს წვდომის საკითხს, რომელიც აწუხებს აზერბაიჯანს და ართულებს ურთიერთობებს, მაგრამ ეს გაცილებით მეტია. მას აქვს პოტენციალი, რომ ღრმად გარდაქმნას სომხეთის ეკონომიკა", — თქვა რუბიომ.