შინაგან საქმეთა სამინისტროს ინფორმაციით, თბილისში ყოფილი ცოლის ცივი იარაღით დაჭრისთვის 1 პირი დააკავეს. ქალი სამედიცინო დახმარების გაწევის მიზნით კლინიკაშია მოთავსებული.

"თბილისის პოლიციის დეპარტამენტის ისანი-სამგორის მთავარი სამმართველოს თანამშრომლებმა, ოჯახის წევრის მიმართ დამამძიმებელ გარემოებებში ჩადენილი განზრახ მკვლელობის მცდელობის ბრალდებით, ერთი პირი ცხელ კვალზე დააკავეს.

გამოძიებით დადგინდა, რომ ბრალდებულმა წარსულში არსებული კონფლიქტის ნიადაგზე, ყოფილ მეუღლეს ცივი იარაღის გამოყენებით რამდენიმე ჭრილობა მიაყენა.
დაჭრილი ქალი შესაბამისი სამედიცინო დახმარების გაწევის მიზნით კლინიკაში მოათავსეს.
სამართალდამცველებმა ჩატარებული ოპერატიული ღონისძიებებისა და საგამოძიებო მოქმედებების შედეგად, დანაშაულის ჩამდენი პირი ცხელ კვალზე დააკავეს," — ვკითხულობთ უწყების განცხადებაში.

ტვ პირველის ინფორმაციით, კაცმა ყოფილი მეუღლე მოტყუებით აიყვანა სახლში, სადაც მას საკანცელარიო დანით ყელის არეში ჭრილობები მიაყენა. 30 წლის ქალის ჯანმრთელობის მდგომარეობა ამ დრომდე კრიტიკულია. თვითმხილველების ინფორმაციით, კაცი ყოფილ მეუღლეზე წარსულშიც ძალადობა და ეს გახდა მათი განქორწინების მიზეზი.

გამოძიება სისხლის სამართლის კოდექსის 11 პრიმა 19-109-ე მუხლის "კ" ქვეპუნქტით მიმდინარეობს, რაც 20 წლამდე ან უვადო თავისუფლების აღკვეთას ითვალისწინებს.