2 თებერვალს, უწყვეტი პროტესტის 67-ე დღეს, თბილისი მოლთან საპროტესტო აქცია გაიმართა. ავტომაგისტრალზე პროტესტის მონაწილეებსა და პოლიციას შორის რამდენჯერმე ჰქონდა ადგილი დაპირისპირებას.

რადიო თავისუფლებას შინაგან საქმეთა სამინისტროს პრესსამსახურში განუცხადეს, რომ საპროტესტო აქციაზე ადმინისტრაციული წესით 31 ადამიანი დააკავეს — მათი ნაწილი ხელწერილის საფუძველზე გათავისუფლდა.

დაკავებულთა შორის არიან: ეროვნული ბანკის ყოფილი პრეზიდენტი გიორგი ქადაგიძე, კოალიცია ცვლილებისთვის წევრი ბადრი გრიგალაშვილი, აქტივისტი დიმიტრი ბიძინაშვილი. ასევე დააკავეს და მოგვიანებით ხელწერილის საფუძველზე გაათავისუფლეს კოალიცია ცვლილებისთვის ერთ-ერთი ლიდერი ნიკა მელია. სავარაუდოდ, დაკავებულია ასევე ოპოზიციონერი პოლიტიკოსი, გიგი უგულავა.

დაკავებულებიდან 5 დაშავებული შეიყვანეს ინგოროყვას კლინიკაში. ექიმების ცნობით მათგან 4 ტვინის შერყევა აღენიშნება.

ექიმის თქმით, იზოლატორებიდან მიყვანილ პაციენტებს აღენიშნებათ სახის და თავის ტრავმა და თავის ტვინის შერყევა.

"გუშინ, საღამოს, დაახლოებით 22:00 საათზე, წინასწარი დაკავების იზოლატორიდან 5 დაშავებული შემოიყვანეს. აქედან 4 პაციენტი ჰოსპიტალიზებულია, ერთმა პაციენტმა საკუთარი სურვილით დატოვა კლინიკა, სხვა კლინიკაში გადავიდა. ძირითადად აღენიშნებოდათ სახის და თავის ტრავმა. თავის ტვინის შერყევით არის მოთავსებული ოთხივე პაციენტი", — აღნიშნა ექიმმა.

ასევე ფიზიკური ძალადობის მსხვერპლი გახდა მთავარის ჟურნალისტი დეა მამისეიშვილი და ტვ პირველის ოპერატორი ნიკო კოკაია, რომელიც ამ დრომდე კლინიკაშია.