მიხეილ ყაველაშვილი საქართველოსთვის ბრძოლას ყველაზე მაღალი პოზიციიდან გააგრძელებს და ის იქნება ადამიანი, რომელიც იმ პოსტს ღირსებას მართლა დაუბრუნებს, რომელიც წინა პრეზიდენტებმა დაუკარგეს, – ამის შესახებ ხალხის ძალის წევრმა, სოზარ სუბარმა პირველ არხთან განაცხადა.

სუბარის თქმით, მიხეილ ყაველაშვილი 2005-2006 წლებში, შვეიცარიაში ცხოვრობდა, კვირა არ გავიდოდა, მასთან არ დაერეკა და დღე და ღამე ლაპარაკობდნენ იმაზე, თუ როგორ უნდა შეეცვალა საქართველოში ვითარება და როგორ დაემთავრებინათ ანტიადამიანური და ანტიქართული რეჟიმი.

"დღეს, როცა პოლიტიკოსები ამაყად ლაპარაკობენ სუვერენიტეტზე, პატრიოტიზმზე, ქვეყნის ინტერესებზე, ეს სამი წლის წინ ასე არ იყო. მიხეილ ყაველაშვილი და ჩვენი გუნდი რომ არ ყოფილიყო, ალბათ, ეს იქნებოდა შეუძლებელი. მიხეილ ყაველაშვილთან დიდი ხნის მეგობრობა მაკავშირებს. 2005-2006 წლებში, შვეიცარიაში მწვრთნელი იყო და იქ ცხოვრობდა. კვირა არ გავიდოდა, რომ ჩემთან არ დაერეკა. მაშინ, სახალხო დამცველი ვიყავი და დღე და ღამე ვლაპარაკობდით იმაზე, თუ როგორ უნდა შეგვეცვალა საქართველოში ვითარება და როგორ დაგვემთავრებინა ანტიადამიანური და ანტიქართული რეჟიმი, როცა ადამიანების წამება, ხალხის ქუჩაში ჩახოცვა, სახლებში შევარდნა და ქონებების წართმევა ყოველდღიური ცხოვრების წესი და პრაქტიკა იყო. იმ დღიდან მოყოლებული მიხეილ ყაველაშვილი საქართველოსთვის იბრძოდა. მიხეილ ყაველაშვილი საქართველოსთვის ბრძოლას ყველაზე მაღალი პოზიციიდან გააგრძელებს და ის იქნება ადამიანი, რომელიც იმ პოსტს ღირსებას მართლა დაუბრუნებს, რომელიც წინა პრეზიდენტებმა დაუკარგეს, მიხეილ ყაველაშვილმა ჩვენი გუნდის წევრებთან ერთად ღირსება დაუბრუნა ქართველ ხალხში, ასევე ეროვნული სიამაყის გრძნობა. რასაც ჩვენ სამი წლის წინ ვამბობდით, იმას ამერიკის ახალი პრეზიდენტი ამბობს. ასევე ევროპაში ბევრი პოლიტიკოსი. მიხეილ ყაველაშვილი ყველაზე თამამად და ვაჟკაცურად ამბობდა იმ სიმართლეს, რაც საქართველოს ბრძოლაა ეროვნული ინტერესებისთვის და მათ შორის ევროინტეგრაციისთვისაც", — განაცხადა სუბარმა.

საქართველოს პრეზიდენტობის კანდიდატად მიხეილ ყაველაშვილი დასახელდა.