"26 ოქტომბრის არჩევნები გამოირჩეოდა სერიოზული დარღვევებით, ნება მომეცით ხმამაღლა და მკაფიოდ განვაცხადო, რომ ეს არჩევნები არ შეესაბამებოდა იმ სტანდარტებს, რომელსაც ევროკავშირის კანდიდატი ქვეყნისგან მოელიან", — ამის შესახებ ევროკომისიის ვიცე-პრეზიდენტმა, მარგარიტის სხინასმა ევროპარლამენტის პლენარულ სხდომაზე საქართველოს საპარლამენტო არჩევნებთან დაკავშირებით განაცხადა.

ევროკომისიის ვიცე-პრეზიდენტის თქმით, სამწუხაროდ, არჩევნები გამოირჩეოდა სერიოზული დარღვევებით. მისი განცხადებით, მმართველმა პარტიამ გამოიყენა საკუთარი მნიშვნელოვანი რესურსები და "ომის შიშის" ფონზე საკუთარი თავი ერთადერთ პოლიტიკურ ძალად წარმოაჩინა, რომელსაც მშვიდობისა და სტაბილურობის უზრუნველყოფა შეეძლო.

მან მადლობა გადაუხადა ევროპარლამენტარებს საქართველოს არჩევნებში სადამკვირვებლო მისიაში მონაწილეობისთვის, რადგან მისი განმარტებით, დელეგაციამ კრიტიკულად მნიშვნელოვანი ინფორმაცია მიაწოდა მათ დაშინების კლიმატისა და ზეწოლის შესახებ.

"26 ოქტომბერს საქართველოს 2 მილიონზე მეტმა მოქალაქემ ახალი პარლამენტის ასარჩევად მისცა ხმა. სამწუხაროდ, ეს არჩევნები გამოირჩეოდა სერიოზული დარღვევებით. დარღვევები აღინიშნებოდა, როგორც საარჩევნო კამპანიის დროს, ასევე, საარჩევნო დღეს.
მინდა ამ დებატების შესაძლებლობა გამოვიყენო იმისთვის, რომ ჩვენი გულწრფელი მადლობა გამოვხატოთ ამ პარლამენტის მიმართ, რომლის 7 ევროპარლამენტარისგან შემდგარი დელეგაცია ხუთ ქვეყანას, ხუთ პოლიტიკურ ჯგუფს წარმოადგენდა და არჩევნების საერთაშორისო სადამკვირვებლო მისიაში მონაწილეობდა. თქვენმა დელეგაციამ კრიტიკულად მნიშვნელოვანი ინფორმაცია მოგვცა დაშინების კლიმატისა და ზეწოლის შესახებ, რომელიც საარჩევნო პროცესში აღინიშნებოდა.
ნება მომეცით თავიდანვე ეს ხმამაღლა და მკაფიოდ განვაცხადო: ეს არჩევნები არ შეესაბამება სტანდარტებს, რომელსაც ევროკავშირის კანდიდატი ქვეყნისგან მოელიან”, — განაცხადა ევროკომისიის ვიცე-პრეზიდენტმა.