ლეონარდო დიკაპრიო 50 წლისაა!

ვარსკვლავთა შორის გამორჩეულმა ვარსკვლავმა ეს მნიშვნელოვანი თარიღი დაუვიწყარი წვეულებით აღნიშნა. მისი დაბადების დღე 11 ნოემბერსაა, თუმცა მსახიობმა იუბილეს აღნიშვნა კვირას დაიწყო და მეგობრებთან და ოჯახის წევრებთან ერთად ინტიმურ პირობებში ისადილა.

სადილის შემდეგ წვეულებამ დიკაპრიოს სახლში, დასავლეთ ჰოლივუდში გადაინაცვლა, სადაც კინოსა და მოდის ინდუსტრიის უამრავი წარმომადგენელი ეწვია. სტუმართა სიაში ალ პაჩინო, სტივენ სპილბერგი, ბრედ პიტი და მისი შეყვარებული, ინეს დე რამონი, ტომი მაგუაიერი, ჯეიმი ფოქსი, პერის ჰილტონი, ქეითი პერი და ორლანდო ბლუმი, კარა დელევინი და უამრავი ცნობილი სახელი ფიგურირებდა. როგორც ირკვევა, წვეულების მუსიკალურ გაფორმებაზე ცნობილმა მუსიკოსმა, Anderson .Paak-მა იზრუნა.

ფოტო: Shizuo Kambayashi / AP

თუმცა, წვეულებამ, რომელსაც სტუმრები სხვადასხვა გამოცემასთან "ლეგენდარულს" უწოდებენ, დიკაპრიოს მეზობლების ძალიან შეაწუხა. Fox News-მა ვიდეო გაავრცელა, სადაც მსახიობის მეზობლები წვეულების მენეჯერსა და თანამშრომლებს ესაუბრებიან და მათი ქონებისთვის მიყენებულ ზარალზე პასუხისმგებელი პირის დასახელებას ითხოვენ.

"ნუ აძლევთ ჩვენს ეზოებში მანქანების შემოყვანის უფლებას!", "ჩემს მანქანას ვიღაც დაეჯახა!", "ზედმეტად ხმაურობთ!" — ეს რამდენიმეა იმ პრეტენზიებიდან, რომელსაც დიკაპრიოს 50 წლის იუბილემ მეზობლებში გამოიწვია. ლოს ანჯელესის პოლიციის დეპარტამენტმა დაადასტურა, რომ დიკაპრიოს წვეულების გამო რამდენიმე საჩივარი მიიღეს.