ნინო ხარატიშვილი ქართველი გერმანულენოვანი მწერალია, რომელმაც უკვე არაერთი საერთაშორისო ჯილდო და პრემია დაიმსახურა. ამჯერად, მან რომანისთვის უკმარი სინათლე მარიო ლატესის საერთაშორისო პრემია მიიღო.

"წიგნისთვის უკმარი სინათლე, რომელიც იტალიურად გამომცემლობა Marsilio-მ გამოსცა, ნინო ხარატიშვილს მარიო ლატესის სახელობის საერთაშორისო პრემია მიენიჭა!
პრემია საუკეთესო იტალიურ და უცხოურ მხატვრულ წიგნებს გამოავლენს. ჟიურის სამოტივაციო წერილში, რომელმაც გასულ გაზაფხულზე ფინალისტ წიგნებს შორის ფაბიო კრემონეზის მიერ იტალიურად თარგმნილი უკმარი სინათლე შეარჩია, ვკითხულობთ:

"ეს წიგნი მოგვითხრობს ოთხი ქართველი გოგონას ცხოვრებას, რომლებიც ერთად იზრდებიან ისტორიული და პოლიტიკური ცვლილებების პერიოდში. წიგნს შეუძლია არა მხოლოდ აღადგინოს ნაკლებად ცნობილი ატმოსფერო, არამედ ფრესკასავით ასახოს ორი საუკუნის მიჯნაზე მყოფი სამყარო, რომელიც პოლიტიკურ ცვლილებას განიცდის და ხმამაღლა ითხოვს დამოუკიდებლობასა და სამართლიანობას.
წიგნი დიდი მოცულობისაა, მაგრამ კითხვას აიოლებს მიმზიდველი წერის მანერა, ნელი რიტმი, შთაბეჭდილების მოხდენის უნარი, თითქოს სიყმაწვილისა და ზრდასრულობის გამყოფ ზღურბლზე ფოტოგრაფირებული, მუდმივად შინაგანი თუ გარეგანი თავისუფლების მაძიებელი პერსონაჟების ხასიათთა განვითარება, — აღნიშნულ ინფორმაციას გამომცემლობა ინტელექტი ავრცელებს.