ლონდონის ეროვნულ გალერეაში განთავსებული პაბლო პიკასოს ნახატი დედობა (La Maternité) დღეს პალესტინელი დედა-შვილის ფოტოთი დაფარეს. აქტივისტების მიზანი ღაზაში მცხოვრები ოჯახების სასიკვდილო საფრთხისკენ ყურადღების მიმართვა იყო.

ნახატის გადაფარვის შემდეგ ორმა აქტივისტმა, 23 წლის ჯაი ჰალაიმ და 21 წლის მანდეი-მალაქი როზენფელდმა გალერეის იატაკზე წითელი საღებავი დაასხეს. ორგანიზაცია Youth Demand-ის მიერ გამოქვეყნებულ ვიდეოში ჩანს, რომ დაკავებამდე როზენფელდი სისხლის სიმბოლოდ ქცეულ საღებავში ზის და მაყურებელს მიმართავს — "თქვენი გადასახადებით ღაზაში მცხოვრები ოჯახების დახოცვა ფინანსდება. ისინი ამბობენ, რომ ამას ებრაელების დასაცავად აკეთებენ, მაგრამ ამას ჩვენთან საერთო არ აქვს."

ლონდონის ეროვნულმა გალერეამ დაადასტურა, რომ პიკასოს ნახატი არ დაზიანებულა. ჰალაი და როზენფელდი კლიმატის ცვლილებებთან მებრძოლი ორგანიზაციის, Just Stop Oil-ის ახალგაზრდული ფრთის, Youth Demand-ის წევრები არიან. Just Stop Oil ხშირად აწყობს მსგავს დემონსტრაციებს საგამოფენო სივრცეებში, რათა მოსახლეობას მნიშვნელოვან სოციალურ მოვლენებზე აუწყოს, თუმცა ისინი არასდროს აზიანებენ ხელოვნების ნიმუშებს.