ალასკის ეროვნულმა ნაკრძალმა ტრადიციული კონკურსი მსუქანი დათვების კვირა ჩაატარა, რომლის გამარჯვებულიც დედა-დათვი სახელად 128 გრეიზერი გახდა.

უნდა ითქვას ისიც, რომ გამარჯვებულისთვის ეს ტიტული პირველი და უცხო არ არის.

კონკურსი, რომელიც ათი წლის წინ დაიწყო, მაყურებელს საშუალებას აძლევს პირდაპირ ეთერში ადევნონ თვალი კატმაის ეროვნულ პარკში მობინადრე დათვებს და აირჩიონ მათთვის საყვარელი მურა დათვი.

კონკურსი მაშინ ტარდება, როცა დათვები ზამთრის ძილამდე მაქსიმალურ წონას კრეფენ. მასში ნაკრძალის ბინადარი დათვები მონაწილეობენ. გამარჯვებული კი ვებგვერდზე explore.org ხმის მიცემის გზით გამოვლინდა. გრეიზერმა 71 ათასზე მეტი ხმა მიიღო.

ივლისში, გრეიზერის კონკურენტმა, 32 ჩანკმა მას ბელი მოუკლა. ეს მაშინ მოხდა, როდესაც გრეიზერის ორი ბელი ჩანჩქერზე გადავარდა, სადაც ჩანკი მათ თავს დაესხა. მოგვიანებით, ერთ-ერთი ბელი მიყენებული დაზიანებების გამო მოკვდა.

explore.org აღნიშნავს, რომ გრეიზერი პირველი "მომუშავე დედაა", რომელმაც მსუქანი დათვების კვირის გამარჯვებულის წოდება მოიპოვა.