Coldplay-ს ახალი ალბომი, Moon Music 4 ოქტომბერს გამოდის. ბენდის სოლისტის, კრის მარტინის თქმით, ამ პროექტის შემდეგ ისინი მხოლოდ 2 ალბომის გამოშვებას აპირებენ.

"ჩვენ მხოლოდ 12 სტუდიურ ალბომს ჩავწერთ და ეს სიმართლეა, გპირდებით. ნაკლები მეტია და, ჩვენი ზოგიერთი კრიტიკოსისთვის, კიდევ უფრო ნაკლები კიდევ უფრო მეტი იქნებოდა! ძალიან მნიშვნელოვანია, რომ რაიმე სახის საზღვარი დავიცვათ," — აღნიშნა Apple Music-თან ინტერვიუში მარტინმა.

კითხვაზე, თუ რატომ უწესებდნენ ბენდს ამგვარ შეზღუდვას, მარტინმა თქვა, რომ "ჰარი პოტერის მხოლოდ 7 წიგნი არსებობს. ბითლზის მხოლოდ 12-ნახევარი ალბომი, დაახლოებით ამდენივე ალბომი აქვს ბობ მარლისაც და ყველა ჩვენს გმირს. ასევე, გარკვეული ლიმიტის არსებობა იმას ადასტურებს, რომ ჩვენ უმკაცრესად ვაკონტროლებთ ჩვენს ხარისხს — სიმღერა იდეალური უნდა იყოს, ალბომში რომ მოხვდეს."

კიდევ ერთი მიზეზი, რის გამოც Coldplay მხოლოდ 2 ალბომის გამოშვებას აპირებს, მარტინის თქმით, ისაა, რომ ყოველი პროექტის განხორციელებას უამრავი ადამიანის რესურსი და სრული თავგანწირვა სჭირდება, ამიტომ ბენდს სურს, რომ თავიანთ გუნდს დასვენების საშუალება მისცეს.

თუმცა, მარტინმა ისიც აღნიშნა, რომ Coldplay-სთან ერთად მისი მუსიკალური კარიერა არ დასრულდება და ის სხვა პროექტებშიც აპირებს მონაწილეობის მიღებას.