ამერიკის ადამიანის უფლებების დაცვის ყველაზე დიდმა ორგანიზაციამ, Human Rights Campaign-მა, მერილ სტრიპს სპეციალური ჯილდო გადასცა ადამიანის უფლებებისთვის დაუღალავი ბრძოლის გამო.

სწორედ ამ ჯილდოს გადაცემის დროს, სიტყვით გამოსვლისას, მერილ სტრიპმა რამდენჯერმე თქვა, რომ ღმერთი ქალია.

"მანჰეტენზე, ჩემი სახლის ფანჯრებიდან კარგად მოჩანს თავისუფლების ქანდაკება. მის შემყურეს, ყოველ ჯერზე მაგონდება ჩემი მასწავლებელი, მისტერ გროსმანი და ჩვენი პირველი ექსკურსია. ასევე, მაგონდება ჩემი დიდი ბებია და ბაბუა, ამერიკაში ახლადჩამოსულებმა, პირველად რომ ჩაუარეს ამ შესანიშნავ ქანდაკებას. ისინი ევროპაში რელიგიურ შეუწყნარებლობას გაექცნენ და ჩვენც, ამერიკელებს, გვაქვს უფლება არ მოვახვიოთ სხვებს თავს ჩვენი რელიგიური რწმენა. გვაქვს უფლება და არჩევანი ვიცხოვროთ ღმერთით, ან მის გარეშე (სწორედ ამ დროს იყენებს სტრიპი ღმერთის აღსანიშნავად მდედრობით ნაცვალსახელს her). მხოლოდ ჩვენ შეგვიძლია გადავწყვიტოთ, ვისთან ვიცხოვროთ, ვინ შევიყვაროთ და როგორ განვკარგოთ საკუთარი სხეული. ამერიკელებს - ქალებსა და კაცებს, გეებსა და ჰეტეროსექსუალებს, ყველა ჩვენგანს გვაქვს უფლებები სიცოცხლეზე, თავისუფლებასა და ბედნიერებისკენ სწრაფვაზე", ამბობს სტრიპი სიტყვით გამოსვლის დროს.

ეს პირველი შემთხვევა არ არის, როდესაც სტრიპი ღმერთზე საუბრის დროს მდედრობითი სქესის ნაცვალსახელს იყენებს, 2010 წელს, სტრიპმა ოქროს გლობუსის დროს ღმერთზე საუბრის დროს ყურადღება გაამახვილა მის მდედრობით სქესზე.

მერილ სტრიპი, რომელიც ცნობილია თავისი ფემინისტური შეხედულებებით, ეს ნაბიჯი გასაკვირი ნამდვილად არ ყოფილა, მით უმეტეს, რომ ის უკვე წლებია რაც გენდერულ უთანასწორობას ებრძვის. მაგალითად, 2015 წლის გაზაფხულზე სტრიპმა სცენარისტთა ახალი ლაბორატორია დააფინანსა 40 წელს გადაცილებული ქალი მწერლებისთვის. მსახიობი მუდმივად საუბრობს ქალ კრიტიკოსთა და ქალ პერსონაჟთა ნაკლებობის შესახებ. მსახიობი ამბობს, რომ ჰოლივუდი სექსიზმის მექაა და ის მთელ ძალისხმევას დახარჯავს იმაში, რომ ამერიკული კინოინდუსტრია ამ სახელისგან გაათავისუფლოს.