ოსკაროსანი მსახიობი გვინეტ პეტროუ ტიმოთი შალამესთან ერთად ჯოშ საფდის ფილმში Marty Supreme ითამაშებს. 2019 წელს Avengers: Endgame-ში თამაშის შემდეგ ეს პელტროუსთვის პირველი პროექტი იქნება.

პელტროუს როლის შესახებ ინფორმაცია ამ დრომდე არ გავრცელებულა.

Marty Supreme-ის სიუჟეტის შესახებ დეტალები ჯერჯერობით საიდუმლოდ რჩება, მაგრამ მას შემდეგ, რაც Variety-მ პროექტის შესახებ ინფორმაცია გაავრცელა, სტუდია A24-მა მაგიდის ჩოგბურთის ფოტო გამოაქვეყნა წარწერით "მალე".

1990-იანი წლებიდან მოყოლებული გვინეტ პელტროუ ერთ-ერთი ყველაზე ცნობილი და კომერციული თვალსაზრისით წარმატებული მსახიობია. მსახიობი დიდ ეკრანზე მას შემდეგ არ გამოჩენილა, რაც რობერტ დაუნი უმცროსთან ერთად ითამაშა ისეთ ფილმებში, როგორიცაა Iron Man და Avengers.

პელტროუმ ოსკარი Shakespeare in Love-ში შესრულებული როლისთვის მიიღო, ასევე თამაშობდა ფილებში: Sliding Doors, Emma, Se7en, The Talented Mr. Ripley, Proof და The Royal Tenenbaums.

მსახიობი ბოლო დროს თავისი დროის დიდ ნაწილს მის მიერ შექმნილ ბრენდ Goop-ს უთმობს, რომელიც მან 2008 წელს დააარსა.

აღსანიშნავია, რომ Marty Supreme-ის სცენარის ავტორები საფდი და რონალდ ბრონშტეინი არიან, რომლებიც ფილმის პროდიუსერებიც იქნებიან.

როგორც ირკვევა, ფილმში ცნობილი ამერიკელი რეპერი, Tyler the Creator-იც მიიღებს მონაწილეობას. მიუხედავად იმისა, რომ ტაილერს რამდენიმე მოკლემეტრაჟიან სკეჩში მონაწილეობა უკვე აქვს მიღებული, დიდ ეკრანზე ეს მისი დებიუტი იქნება.

ჯოშ საფდის რეჟისორობით განსაკუთრებით ცნობილია ფილმები Uncut Gems და Good Time.