ევოლუშენ ჯორჯიას გაფიცულმა თანამშრომლებმა, მთავრობას მიმდინარე პროცესებში ჩართვისა და პოზიციის დაფიქსირებისკენ მოუწოდეს.

მათი თქმით, განვითარებულ მოვლენებზე პასუხისმგებლობა მთავრობას და კომპანიას ეკისრებათ, შესაბამისად, თუ ხელისუფლება 20:00 საათამდე ამ თემასთან დაკავშირებით განცხადებას არ გაავრცელებს, ისინი იძულებული იქნებიან დიდუბეში, თორნიკე ერისთავის ქუჩა გადაკეტონ.

„დღეს გაფიცვის 39-ე დღეა და ამ დროის განმავლობაში არც ხელისუფლებას და არც პრეზიდენტს არ გაუკეთებია განცხადება და არც სახალხო დამცველი მოსულა ადგილზე. მომავალში განვითარებულ პროცესებზე პასუხისმგებლობას ხელისუფლებასა და ამ კომპანიას ვაკისრებთ. მე-7 დღეა ადამიანები შიმშილობენ და არ დავუშვებთ მათ სიცოცხლესა და ჯანმრთელობას საფრთხე შეექმნას.

ჩვენ ხელისუფლებას მოვუწოდებთ, რომ 20:00-მდე გააკეთოს განცხადება. ასევე მოვუწოდებთ საზოგადოებას, ამ ქვეყანაში შრომითი უფლებების დაცვის მიზნით, მოვიდნენ და სოლიდარობა გამოუცხადონ ადამიანებს, რომლებიც დასაქმებულები არიან ამ კომპანიაში. წინააღმდეგ შემთხვევაში, იძულებულები ვართ, რომ ჩვენს წინ არსებული გზა გადავკეტოთ”, – განაცხადა პროფკავშირი „ლაბორის” თავმჯდომარემ, გიორგი დიასამიძემ.

12 ივლისიდან, ევოლუშენ ჯორჯიას თანამშრომლები საკუთარი უფლებების დასაცავად კომპანიის მიმდებარე ტერიტორიაზე სხვადასხვა სახის პროტესტს მიმართავენ. გაფიცულები ამბობენ, რომ ვიდრე მოთხოვნები არ დაკმაყოფილდება უკან დახევას არ აპირებენ და ყველაფრისთვის მზად არიან.

შეგახსენებთ, გაფიცულთაგან სამი თანამშრომელი მე-7 დღეა შიმშილობს.

გაიგე მეტი: