რუსეთის ბელგოროდის ოლქის გუბერნატორმა ვიაჩესლავ გლადკოვმა უკრაინიდან მომდინარე საფრთხის ფონზე საგანგებო მდგომარეობა გამოაცხადა.

"დღეიდან ვიღებთ გადაწყვეტილებას ბელგოროდის ოლქის მთელ ტერიტორიაზე მოსახლეობის დამატებითი დაცვისა და დაზარალებულთა დახმარების მიზნით გამოვაცხადოთ რეგიონული დონის საგანგებო მდგომარეობა, და სამომავლოდ ვიტოვებთ უფლებას მივმართოთ სამთავრობო კომისიას ფედერალური დონის საგანგებო მდგომარეობის შემოღების თხოვნით", — თქვა მან.

გლადკოვმა აღნიშნა, რომ რეგიონში ვითარება კვლავ "ძალიან რთული და დაძაბულია".

რუსეთში საგანგებო რეჟიმი ითვალისწინებს, საგანგებო ზონაში ადამიანებისა და ტრანსპორტის გადაადგილების შეზღუდვასა და მოსახლეობის ევაკუაციას. გადაუდებელი შემთხვევების დონეებია - ადგილობრივიდან ფედერალურამდე , რაც განისაზღვრება მსხვერპლთა რაოდენობისა და ზიანის მოცულობით.

მანამდე საგანგებო მდგომარეობა შემოიღეს რუსეთის კურსკისა და ლიპეცკის ოლქებში.

შეგახსენებთ, კურსკის ოლქში შეტაკებები 6 აგვისტოს დაიწყო. უკრაინა ამჟამად რუსეთის ტერიტორიაზე 74 ქალაქს აკონტროლებს.