რა ხდება: დღეს სასამართლომ მსახიობი ნატალია ყიფშიძე და რუსული კანონის სხვა მოწინააღმდეგეები 500 ლარით დააჯარიმა.

  • მათ პოლიციისადმი დაუმორჩილებლობისა და გზის უკანონოდ გადაკეტვის გამო ედავებიან.

დეტალები: ყიფშიძის საქმეს მოსამართლე ირაკლი ჩიკაშუა განიხილავდა, მის ინტერესებს კი ადვოკატი თეონა კილაძე იცავდა.

  • "ნებისმიერ დემოკრატიულ ქვეყანაში ეს სასამართლო პროცესი ჩვენი, ანუ სიმართლის გამარჯვებით დასრულდებოდა. მეტიც — ნებისმიერ დემოკრატიულ ქვეყანაში ეს სასამართლო პროცესი არც იარსებებდა. 24 აპრილს 21:08- ზე მივედი პარლამენტის ტერიტორიაზე. კანონს ვითვალისწინებდი და ვიდექი ტროტუარზე, სანამ არ შევიკრიბეთ იმდენი თანამოაზრე, რომ მარში კანონიერი ყოფილიყო. მე არ ვმალავ აქციაზე სიარულს, პირიქით სიამაყით ვამბობ ხმამაღლა რომ ყველა ნამდვილ პატრიოტთან ერთად ვდგავარ აქციაზე ბოლო 2 თვის მანძილზე", — წერს ფეისბუქზე ნატალია ყიფშიძე.

მისი თქმით, გზა უკანონოდ არ გადაუკეტავთ და კითხვაზე, თუ რამდენი ადამიანია საკმარისი იმისთვის, რომ სავალი ნაწილის გადაკეტვა სამართლიანად ჩათვლილიყო, პასუხი ვერ მიიღეს.

  • "ვცხოვრობთ ქვეყანაში, სადაც არ გვაქვს სასამართლოს სამართლიანობის იმედი და პოლიციის დანახვისას ვერ ვგრძნობთ თავს უსაფრთხოდ. ჩვენი ქვეყნის დღევანდელ წყობას, შემთხვევით, რომელიმე ქვეყნის რეჟიმს ხომ არ ამსგავსებთ?" — წერს ნატალია ყიფშიძე.

დღევანდელ სხდომაზე მოსამართლე ლელა ცაგარეიშვილმა 500 ლარით დააჯარიმა, ასევე, აქციის სხვა მონაწილეებიც — ლუკა შველიძე, საბა ბირკაია, ბაჩო ძანძავა და ნიკა ხოსროშვილი.