ჟურნალისტ იმრან ალიევს, რომელიც ჯგუფურად კონტრაბანდის ბრალდებით დააკავეს, აზერბაიჯანის პოლიციამ, სავარაუდოდ, სცემა და აწამა.

meclis.info-ს დამფუძნებელი ალიევი ხუთშაბათს დააკავეს და მეორე დღეს ორთვიანი წინასწარი პატიმრობა შეუფარდეს. პარასკევს სასამართლო შენობასთან ალიევმა განაცხადა, რომ სცემეს და აწამეს ელექტროშოკით, რათა იძულებული ყოფილიყო, ხელი მოეწერა დოკუმენტებზე და ეღიარებინა ბრალდება.

ალიევი ბრალდებას უსაფუძვლოსა და შეთითხნილს უწოდებს.

ოთხშაბათს ბაქოს სააპელაციო სასამართლომ არ დააკმაყოფილა ჟურნალისტის საჩივარი, დაკავებასთან დაკავშირებით.

იმავე დღეს, ფემინისტმა აქტივისტმა გულნარა მეჰდიევამ და უფლებადამცველმა რუფატ საფაროვმა დაწერეს, რომ ალიევის ახლობლების თქმით, სასამართლოს შემდეგ, ჟურნალისტი პოლიციამ კვლავ აწამა.

ალიევის ნათესავები ოთხშაბათს სასამართლო სხდომას დაესწრნენ. მათ მეჰდიევას უთხრეს, რომ იმრანი ნაცემი ჩანდა.

შინაგან საქმეთა სამინისტროს სპიკერმა Turan-ს განუცხადა, რომ პრეტენზიები "უსაფუძვლოა".

ალიევი ბაქოს აეროპორტში 18 აპრილს დააკავეს, მას შემდეგ რაც პროსამთავრობო გამოცემა Qafqaz.info-მ გამოაქვეყნა სტატია, რომელშიც ნათქვამია, რომ ალიევი AbzasMedia-სა და Toplum TV-ის ჟურნალისტებთან ერთად, ფულის კონტრაბანდაში მონაწილეობდა.

ამ მედიასაშუალებების თანამშრომლები მასობრივად დააპატიმრეს, 2023 წლის ნოემბრიდან. ყველა დაკავებული ჟურნალისტი უარყოფს ბრალდებას და ამბობენ, რომ ეს ბრალდებები ცრუ და პოლიტიკურად მოტივირებულია.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.