რა მოხდა: დღეს, 3 აპრილს, ქართული ოცნების აღმასრულებელმა თავმჯდომარემ და უმრავლესობის ლიდერმა, მამუკა მდინარაძემ განაცხადა, რომ მმართველი პარტია ისევ აპირებს, "უცხო აგენტად" გამოაცხადოს დამოუკიდებელი მედიასაშუალებები და არასამთავრობო ორგანიზაციები, რომელთა შემოსავლის 20%-ზე მეტის წყარო "უცხოური ძალაა", ანუ საგრანტო პროექტებია.

• მდინარაძის თქმით, "კანონპროექტი საქართველოს პარლამენტში დაინიცირდება ზუსტად იმავე ტექსტით, როგორც შარშან იყო".

რუსული კანონის ხელახლა ინიციირების შესახებ, სოციალურ ქსელში თეოლოგები, პოლიტიკოსები, აქტივისტები და ჟურნალისტები აქტიურად მსჯელობენ იმაზე თუ რა შეიძლება იყოს ქართული ოცნების მიზანი.

On.ge რამდენიმე მათგანს გთავაზობთ:

დავით ბერძენიშვილი: რესპუბლიკური პარტიის წარმომადგენლის შეფასებით, ბიძინა ივანიშვილმა რუსეთის პრეზიდენტის ვლადიმერ პუტინის გამარჯვება ირწმუნა და საქართველოში, ანტიდასავლურ ხაზს განუწყვეტლივ აძლიერებს: "ბრიუსელს ეუბნება, შენს მიერ შესრულებულად ჩათვლილ ქალთა პოლიტიკაში ჩართულობის რეკომენდაციას თავზე გადაგახევო, ვაშინგტონს - აბა ჩვენს მოსამართლეებს სანქციები მოუხსენიო, ხომ ვერაფერი დაგვიმტკიცეო".

ბერძენიშვილის თქმით, ბიძინა ივანიშვილი Gen Z-ის "ამოწმებს და პასუხსაც მიიღებს", ხოლო პუტინის რეჟიმი ისევე დაემხობა, როგორც ჰიტლერის ნაციზმი განადგურდა და ამოიშანთა.

"მწარედ დაისჯება [ბიძინა ივანიშვილი], ძალიან მწარედ...საშვილიშვილოდ!!!", — წერს ბერძენიშვილი.

ანა ნაცვლიშვილი: პარტია ლელოს დეპუტატი ფეისბუქზე წერს, რომ ქართული ოცნების გემი იძირება და "როგორც ბოროტ ძალას სჩვევია, უნდათ ამ გემმა მთელი ქვეყანა ჩაიყოლო".

ნაცვლიშვილის თქმით, რადგან არ სურს [ქართულ ოცნებას] საქართველო ევროპაში, მათ გარეშე უნდა გავაგრძელოთ ეს გზა: "ზღაპრის ბოლო კეთილია!".

მერაბ მეტრეველი: ჟურნალისტი წერს, რომ ქართული ოცნების მიზანია არა ფინანსური გამჭვირვალობა, არამედ მათ სურთ ყველას, ვისაც ვერ აკონტროლებენ, "უცხოური ძალის ინტერესების გამტარებელ ორგანიზაციის" იარლიყი მიაწებონ.

"გამჭვირვალობას რაში ჭირდება ორგანიზაციებისთვის იარლიყის მიწებებას? ფინანსურ დეკლარაციასაც ისე ვერ შეავსებს რომელიმე არასამთავრობო, თუ "უცხოური ძალის ინტერესების გამტარებელ ორგანიზაციას" არ დაირქმევს?", — წერს მეტრეველი.

შოთა დიღმელაშვილი: მოძრაობა შინ ევროპისკენ ერთ-ერთი ლიდერის თქმით, რუსული კანონის ხელახლა დაინიცირება, სავარაუდოდ, ევროკავშირში ე.წ. EU Fara-ს დაინიცირებას უკავშირდება.

"ევროკავშირში კანონმდებლობა ლობიზმის გამჭვირვალობას, კერძოდ კი რუსულ-ჩინური გავლენების გამოვლენას ცდილობს, ხოლო საქართველოში, ისევე როგორც რუსეთში — პროდასავლური სამოქალაქო საზოგადოების შევიწროებასა და სტიგმატიზაციას".

ბექა მინდიაშვილი: თეოლოგი ფეისბუქზე წერს, რომ თუ არ დავიცავთ პრინციპს — ყველა ერთად ერთის წინააღმდეგ, პროტესტი უშედეგო იქნება.

"დიდი საყოველთაო და შედეგიანი პროტესტის მთავარი კანონი არის მიზნის მიღწევაზე ორიენტაცია და ერთმანეთთან დაპირისპირებაზე, ერთმანეთის დამუნათებაზე უარის თქმა. არა რუსულ კანონს!", — წერს მინდიაშვილი.

ნინია კაკაბაძე: ჟურნალისტის თქმით, ქართული ოცნება პირდაპირ და დაუფარავად ამბობს რომ საკონსტიტუციო უმრავლესობა უნდა, რაშიც ხელს არასამთავრობო სექტორი და დამოუკიდებელი მედია უშლის.

"ღია ომი გამოაცხადეს. ამ ბრძოლაში ან დამარცხდებიან და გაუყვებიან რუსული გემის გზას ან შეეგუეთ რომ პუტინის რუსეთში ვრჩებით!", — წერს კაკაბაძე.

გაიგე მეტი: რატომ არის ქართული ოცნების კანონი რუსული — მოკლედ და მარტივად