კინოდოკუმენტალისტი სალომე ჯაში ახლახან ბერლინის ხელოვნების აკადემიის ჯილდოს მფლობელი გახდა. ამის შესახებ ინფორმაციას სოციალურ ქსელში საქართველოს კინოინსტიტუტი ავრცელებს. ბერლინის ხელოვნების პრემია 1948 წელს დაარსდა, რის შემდეგაც ბერლინის ხელოვნების აკადემია პრიზებს ყოველწლიურად გასცემს, წელს კი ერთ-ერთი გამარჯვებული სწორედ სალომე ჯაშია.

ხელოვანების მხარდაჭერისა და განვითარების მიზნით, ბერლინის ხელოვნების აკადემიის ჯილდო — პრიზი ან სტიპენდია — შემოქმედებითი მიღწევებისთვის ყოველწლიურად 6 კატეგორიაში გაიცემა. ეს კატეგორიებია: ვიზუალური ხელოვნება, არქიტექტურა, მუსიკა, ლიტერატურა, სასცენო ხელოვნება და კინო და მედია ხელოვნება. სალომე ჯაშმა კი ჯილდო კინოსა და მედია ხელოვნების კატეგორიაში მოიპოვა.

"კინოსა და მედია ხელოვნების ჯილდო გადაეცა ქართველ კინოდოკუმენტალისტს, რომელიც ასევე არის საქართველოს დოკუმენტური ასოციაცია დოკას თავმჯდომარე და ასევე, საქართველოს კინოინსტიტუტის კინემატოგრაფისტთა საბჭოს წევრი. სალომე ჯაში არის რეჟისორი საერთაშორისო კინოსცენაზე აღიარებული ფილმებისა, როგორებიცაა, მოთვინიერება, Taming the Garden, დაისის მიზიდულობა, ბახმარო და სხვა. საქართველოს კინოინსტიტური ულოცავს სალომე ჯაშს ამ გამარჯვებას და წარმატებებს უსურვებს მომავალი პროექტების განხორციელებაში", — ვკითხულობთ საქართველოს კინოინსტიტუტის განცხადებაში.

ბერლინის ხელოვნების აკადემიის დაჯილდოების ცერემონია 18 მარტს გაიმართება.