პერუში, ვალენტინობის დღეს, ნარკოდილერს სახლთან დათვის ფორმაში გამოწყობილმა ადამიანმა მიაკითხა, რომელსაც ხელში საჩუქრებიც ეჭირა. ნარკოდილერი ქალი სახლიდან გამოვიდა, რათა გაეგო, ვინ იყო ვალენტინობის დღის სიურპრიზის ავტორი, თუმცა სულ სხვა სიურპრიზის წინაშე აღმოჩნდა.

დათვის ფორმაში გამოწყობილი ადამიანი პოლიციელი აღმოჩნდა, რომელსაც ნარკოდილერობაში ეჭვმიტანილი ქალის სახლიდან გამოტყუება სურდა. ქალი ადგილზევე დააკავეს, სახლის გაჩხრეკისას კი ლეიბებში დამალული ნარკოტიკული საშუალებები იპოვეს.

ნარკოდილერი ქალის დაკავების კადრები პერუს ეროვნულმა პოლიციამ გაავრცელა. კადრებში ვხედავთ, დათვის ფორმაში გამოწყობილი პოლიციელი როგორ ადებს ქალს ხელბორკილებს. შემთხვევის ადგილზე პოლიციამ კიდევ ერთი ეჭვმიტანილი ქალი დააკავა. დაკავებული ქალები მაშინვე პოლიციის განყოფილებაში გადაიყვანეს.