აზერბაიჯანის ელჩი აშშ-ში, ელინ სულეიმანოვი, აფგან მუხტარლის დაკავებაზე, ამერიკის ხმასთან ინტერვიუში აცხადებს, რომ ერთი პირის მიერ საზღვრის უკანონო კვეთის საქმისგან არასაჭირო სკანდალის შექმნა და ამის პოლიტიკურ პრობლემად წარმოჩენა "ორი ქვეყნის მტკიცე პარტნიორობის ძირის გამოთხრის მცდელობაა".

ელჩის თქმით, საქართველოსა და აზერბაიჯანის წინაშე ბევრი საკითხი დგას. მისივე განცხადებით, მუხტარლის საქმე საზიანოა როგორც საქართველოსა და აზერბაიჯანის მომავლისთვის, ისე მთელი რეგიონისთვისს:

"აზერბაიჯანის საზღვრის დაცვის სამსახურმა დააკავა აზერბაიჯანის მოქალაქე რომელიც საქართველოს საზღვარს უკანონოდ კვეთდა. ის დააკავეს კონკრეტულად ჩვენი პროცედურების შესაბამისად. კარგი იქნება თუ დაველოდებით ოფიციალური გამოძიების პასუხებს აზერბაიჯანელი სამართალდამცავებისგან".

თბილისიდან 29 მაისს გაუჩინარებული ჟურნალისტი, აფგან მუხტარლი, რომელიც მეორე დღეს ბაქოს ციხეში აღმოჩნდა, ამბობს, რომ ის საქართველოს დედაქალაქიდან კრიმინალური პოლიციის ფორმიანმა პირებმა გაიტაცეს. აზერბაიჯანის ხელისუფლების ინფორმაციით, მუხტარლი საზღვრის უკანონო კვეთის გამო დააკავეს და მას უკვე შეეფარდა სამთვიანი წინასწარი პატიმრობა.