საბრინა კარპენტერის ახალ სიმღერაზე გადაღებული ვიდეოკლიპის გამო აშშ-ის ერთ-ერთ კათოლიკურ ეკლესიაში მღვდელი დასაჯეს. ამერიკელმა პოპვარსკვლავმა 31 ოქტომბერს, ჰელოუინზე, სიმღერა Feather-ზე შექმნილი კლიპი გამოუშვა. ვიდეო ბრუკლინში, უილიამსბურგის კათოლიკურ ეკლესიაშია გადაღებული. მის ერთ-ერთ სცენაში შავ კაბაში გამოწყობილი კარპენტერი ფერადი კუბოებით გაფორმებული საკურთხევლისკენ მიემართება და ცეკვას იწყებს. ვიდეოკლიპს დიდი გამოხმაურება მოჰყვა — იუთუბზე მას უკვე 12 მილიონზე მეტი ნახვა აქვს. თუმცა, ნანახმა ყველა როდი მოხიბლა.

ვიდეოს გამოსვლიდან სულ რამდენიმე დღეში ბრუკლინის ეპარქიამ განცხადება გაავრცელა, რომელშიც კლიპი დაგმო და აღნიშნა, რომ ისინი ნანახით "თავზარდაცემულნი" არიან. როგორც გაირკვა, კარპენტერს ეკლესიაში გადაღების ნებართვა მონსენიორმა ჯეიმი ჯაიგენტიელომ მისცა. ეპარქიის განცხადებით, მონსენიორმა "დაარღვია ეკლესიის საკუთრებაში გადაღების პოლიტიკა, რომელიც მოიცავს გადასაღები სცენებისა და სცენარის გადახედვას". ამის გამო, ჯაიგენტიელოს საქმიანობის უფლება შეუჩერდა. ეპისკოპოსმა კი ეკლესიაში "გამოსასწორებელი მესა" აღავლინა, რითაც, ეპარქიის თქმით, ტაძარს "სიწმინდე დაუბრუნდა და მიყენებული ზიანი ანაზღაურდა".

რაც შეეხება მონსენიორ ჯაიგენტიელოს, მან ეკლესიის ფეისბუქგვერდით ასევე გააკეთა განცხადება და ბოდიში მოიხადა. მისი თქმით, კარპენტერის წარმომადგენლები სექტემბერში დაუკავშირდნენ ეკლესიის ტერიტორიაზე გადაღების თხოვნით. ჯაიგენტიელო ამბობს, რომ მან ინტერნეტში მოძიებული ინფორმაციით კარპენტერს "საეჭვო" ვერაფერი შეატყო და თხოვნას დადებითად უპასუხა. მღვდელი ამატებს, რომ მისი მიზანი "ეკლესიასა და ახალგაზრდა ხელოვანებს შორის კავშირის" გაძლიერება იყო. თუმცა, მისივე თქმით, ტაძარში თავდაპირველად გასვენების სცენის გადაღება იგეგმებოდა, ვიდეოკლიპის საბოლოო ვერსიაში ნანახი კი მისთვის არ შეუთანხმებიათ.

ეპარქიის წარმომადგენელი ამბობს, რომ მესაზე მისული მრევლი, დაახლოებით 50 ადამიანი, კარპენტერის ვიდეოში ნანახით "აღშფოთებული" იყო. თუმცა, ამბავს სოციალურ ქსელშიც ბევრი კათოლიკე გამოეხმაურა და აღნიშნა, რომ მონსენიორის სასჯელი მის დანაშაულთან შეუსაბამოა.

ფოტო: Christopher Polk / Billboard

24 წლის საბრინა კარპენტერი ბევრმა წინა ათწლეულის დასაწყისში გაიცნო, როცა იგი დისნეის სერიალში Girl Meets World გამოჩნდა. 14 წლის კარპენტერმა უკვე პირველ ლეიბლთან გააფორმა კონტრაქტი და მალევე სადებიუტო ალბომიც გამოუშვა.

პოპვარსკვლავებისა და ეკლესიის დაპირისპირება კი არახალია. ჯერ კიდევ 1989 წელს, როცა მადონამ თავისი ერთ-ერთი ყველაზე ცნობილი ჰიტი Like a Prayer გამოუშვა, მის ვიდეოკლიპში კათოლიკური სიმბოლიკის გამოყენებას მასობრივი პროტესტი მოჰყვა. კათოლიკური საზოგადოების კრიტიკა დაიმსახურა ლედი გაგას 2010 წლის სიმღერაზე Alejandro გადაღებულმა ვიდეოკლიპმაც.

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...